Унагасан гар утсаа олохын тулд усны нөөцийн даланг хоослох тушаал өгсөн Энэтхэгийн төрийн албан хаагч шийтгүүлжээ
Унагасан гар утсаа олж авахын тулд аварга том усан санг хоослох тушаал өгсөн Энэтхэгийн төрийн албаны түшмэлийг албан тушаалаас нь түдгэлзүүлжээ.
Ражеш Вишвас "сэлфидэж" байгаад алдаж унагасан гар утсаа олж авахын тулд далангийн хэдэн сая литр усыг гурван өдрийн турш шавхуулсан юм байна.
Харамсалтай нь ийм нүсэр ажлын дараа олж авсан гар утас нь ажиллах боломжгүй болсон байжээ.
Вишвас гар утсанд нь төрийн чухал баримт байсан гэж өөрийн үйлдлийг зөвтгөсөн байна. Гэсэн ч орон нутгийн засаг захиргаа түүнийг албан тушаалаа хэтрүүлэн ашигласанд буруутгаж, ажлаас нь түдгэлзүүлжээ.
Хоол хүнсний хяналт шалгалтын албанд ажилладаг тэрбээр $1,200 орчим үнэтэй Самсунг үйлдвэрийн гар утсаа Ням гарагт Энэтхэгийн төв бүсийн Чхаттисгарх мужийн Херкатта усан даланд унагасан юм байна.
Эхлээд шумбагчдыг дайчилсан ч үр дүнд хүрээгүй тул Вишвас дизель насос авчруулан далангийн усыг шавхах ажлыг эхлүүлжээ.
Түүний шавхсан ус зургаан хавтгай дөрвөлжин километр хэмжээтэй тариан талбайг услахад хүрэлцэхээр байсан гэнэ.
Нутгийн иргэдийн гомдлын дагуу далан дээр ирсэн усны нөөцийн албаны ажилтан Вишвасын үйлдлийг таслан зогсоож байжээ.
“Шалгаж дуусах хүртэл түүнийг албан тушаалаас нь түдгэлзүүлсэн. Амин чухал усны нөөцийг ингэж үрэх ёсгүй” гэж далан харьяалагддаг Канкер дүүргийн албан тушаалтан Приянка Шукла хэвлэлд ярьсан байна.
Жил бүрийн зун Энэтхэгийн зарим нутагт ган гачиг, хэт халалт тохиож, усны нөөц хомстдог юм.
Эх сурвалж: BBC
