Н.Баярмаа: Эрэгтэйчүүдэд сэтгэл зүйн оношилгоо хийж, ганцаарчилсан зөвлөгөө өгөх төв нээгдлээ

Гэрэл зургийг MPA агентлагийн онцгой зөвшөөрөлтэйгөөр ашиглав

Чингэлтэй дүүргийн Гэр бүл, хүүхэд залуучуудын хөгжлийн хэлтсийн дэргэд "Эрэгтэйчүүдэд зөвлөгөө мэдээлэл өгөх, жишиг төв" өнөөдөр нээгдлээ. 

Хөдөлмөр, нийгмийн хамгааллын яам(ХНХЯ)-наас НҮБ-ын Хүн амын сан, Швейцарын хөгжлийн агентлагтай хамтран хэрэгжүүлж буй "Жендэрт суурилсан хүчирхийлэлтэй тэмцэх нь" төслийн хүрээнд уг жишиг төвийг анх удаа байгуулжээ. 

Жишиг төвийн үйл ажиллагааг нээж байгаатай холбогдуулан 21 аймаг, есөн дүүргийн хэмжээнд 70 сургагч багшийг бэлтгэсэн байна.

Уг төвд дараах үйлчилгээг иргэд, олон нийтэд үнэ төлбөргүй үзүүлнэ. Тухайлбал:

• Судалгаа, шинжилгээний ажил
• Сургалт зохион байгуулах
• Эрэгтэйчүүдийн чиглэлээр үйл ажиллагаа явуулдаг ТББ-ын үйл ажиллагааг дэмжих
• Хууль эрх зүй, нийгэм, сэтгэл зүйн зөвлөгөө, мэдээллийг мэргэжлийн нийгмийн ажилтан, сэтгэл зүйчээс утсаар болон биечлэн авах боломжтой.

Энэ үеэр ХНХЯ-ны Гэр бүлийн бодлогын хэрэгжилтийг зохицуулах газрын дарга Н.Баярмаа "Үндэсний статистикийн хорооноос гаргасан судалгаагаар эмэгтэй, эрэгтэй хүний дундаж наслалтын зөрүү 9.6 байна. Тиймээс энэ зөрүүг ойртуулах, эрэгтэйчүүдийн амьдралын чанарыг сайжруулах шаардлага үүссэн.

Дундаж насны зөрүү их байгааг судлахад "Зүрх судас болон халдварт өвчин, осол гэмтлээр нас барах тохиолдол их байна" гэдэг үр дүн гарсан.

Энэ асуудлыг шийдвэрлэхийн тулд эрчүүдээ сонсож, сэтгэл зүйн зөвлөгөө өгөх зорилгоор энэхүү төвийг нээсэн. Үндэсний хэмжээнд гэр бүл, хүүхэд залуучуудын чиглэлээр үйл ажиллагаа явуулж байгаа төрийн болон төрийн бус байгууллагуудад сургагч багш нарыг бэлтгэсэн. 

Уг төвд эрэгтэйчүүдэд зөвлөгөө өгөх тусламжийн утас ажиллуулна. Түүнчлэн хууль эрх зүй, сэтгэл зүй, эрүүл мэнд, халамж, хөдөлмөр эрхлэлтийн талаарх 500 гаруй асуулттай зөвлөгөөний картыг бэлэн болгосон. 

Мөн эрэгтэйчүүдэд сэтгэл зүйн оношилгоо хийж, ганцаарчилсан зөвлөгөө өгнө. Энэ чиглэлээр мэргэшсэн төрийн бус байгууллагатай 2023 оныг дуустал гэрээгээр ажиллахаар төлөвлөсөн. 

Цаашид эрэгтэйчүүдийн чиглэлээр үйл ажиллагаа явуулдаг үндэсний сүлжээ үүсгэж ажиллана" гэдгийг онцлов.