Нэтфликсийн “The Glory” цувралын найруулагч бага залуудаа бусдыг дээрэлхэж байснаа хүлээн зөвшөөрөв

Нэтфликсийн үзэгчдийг байлдан дагуулж буй Өмнөд Солонгосын ээлжит уран бүтээл нь “The Glory” цуврал билээ.

Уг цувралд нэг эмэгтэй өөрийг нь дээрэлхэж, тамлан зовоодог байсан ахлах сургуулийн ангийнхнаасаа өшөө авч буй түүхийг үзүүлдэг.

Өнгөрсөн Баасан гарагт сошиал сүлжээнд нэг хүн дээрх цувралын найруулагч Ан Гил Хо сургуульд байхдаа өөрийг нь болон өөр нэг сурагчийг дээрэлхэж байсныг бичсэн юм.

Ням гарагт гаргасан мэдэгдэлдээ найруулагч үүнийг хүлээн зөвшөөрч, хохирогчдоос уучлал гуйжээ.

“Найруулагч Ан 1996 онд Филиппинд суралцаж байхдаа найз охинтой байсан. Тэрбээр найз охиноо өөрөөс нь болоод бусдын элэг доог болж буйг сонсоод уур бухимдлаа бусдад гаргасан тохиолдол бий. Тиймээс найруулагч хохирсон хүмүүсээс чин сэтгэлийн уучлал гуйж, боломж гарвал биеэр уулзах, утсаар холбогдох замаар үүнийгээ илэрхийлэх хүсэлтэй байна” гэж түүнийг төлөөлдөг хуулийн фирмээс гаргасан мэдэгдэлд бичсэн байна.

“Тухайн үед Аныг оролцуулаад нийт 15 хүн тэнд байсан. Тэр найз охиныг нь хэн шоолсныг биднээс асуугаад хариулахгүй бол хутгалахаар сүрдүүлж, дараа нь бүлэглэж зодсон. Зодуур хоёр цаг орчим хугацаанд үргэлжилсэн. Хэрвээ Ан зөв амьдарч байсан бол би үүнийг ил гаргахгүй байлаа. Гэвч тэр “The Glory” цувралаараа дээрэлхэлт дэглэлтийн талаар нийгэмд хичээл зааж эхэлсэнд нь би бухимдаад илчлэхээр шийдсэн юм” гэж хохирогч бичжээ.

Түүнийг ингэж бичсэний дараа эхлээд Ан буруугаа хүлээн зөвшөөрөхгүй байв.

“Ийм зүйл огт болж байгаагүй. Би бусдыг зодож байснаа санахгүй байна” гэж найруулагч Ёнхап агентлагт ярьж байлаа.

Дараа нь Аны найз охин байсан эмэгтэй энэ талаар дурсамжаа хэвлэлд ярьжээ.

“Найзууддаа шоолуулах нь тийм ч ноцтой зүйл байгаагүй. Би үүнийг жирийн тоглоом шоглоом гэж хүлээж авч байсан. Намайг шоолсны төлөө ийм үйлдэл гаргахыг мэдэж байсан бол би түүнд энэ талаар хэлэхгүй байсан юм” гэж тэр эмэгтэй ярьсан байна.

Дараа нь бас Ан найруулагчийн дээрэлхэлтийн түүхийг мэдэх өөр хүмүүс ч гарч ирсэн юм.

Өнгөрсөн Баасан гарагт хоёр дахь бүлэг нь цацагдаж эхэлсэн “The Glory” цуврал Нэтфликс платформын хамгийн их үзэлттэй контентын жагсаалтын гуравдугаарт бичигдээд байна.

Эх сурвалж: Yonhap News, Korea Times