Саудын Араб улс Украинд $100 саяын тусламж илгээжээ

Украины засгийн газар Саудын Араб улсаас $100 саяын өртөг бүхий хүмүүнлэгийн тусламж хүлээж авснаа өчигдөр мэдээлжээ.

“Тусламжийн бараа бүтээгдэхүүнд 20-400 киловаттын 135 ширхэг цахилгаан генератор, дулаан хөнжил, эрүүл ахуйн материалууд багтаж байна” гэж Украины ерөнхийлөгчийн тамгын газрын дарга Андрей Ермак өчигдөр сошиал хуудсандаа бичсэн байна.

Тэрбээр бас Саудын Арабын эрх баригчдад талархал илэрхийлжээ.

Гурван ачааны нисэх онгоцоор тээвэрлэгдэж ирсэн барааг Украины зургаан бүс нутгийн иргэдэд тараахаар төлөвлөсөн байна.

Саудын Арабын засгийн газрын тусламж нь Украиныг дэлхийн олон улс орон, тэдгээрийн дотор Ойрх Дорнодын орнууд ч дэмжиж байгаагийн илрэл болж буй тул Киевийн эрх баригчид болон Өрнөдийн холбоотнуудын хувьд бэлгэдлийн чухал ач холбогдолтой гэж ажиглагчид үзэж байна.

Эх сурвалж: Reuters