УИХ-ын дарга "Авлига хороолол"-ын талаар "А" гэж дуугарахгүй байсаар чуулганы хугацааг дуусгав
2024 оны сонгуулийн дүнгээр байгуулагдсан 126 гишүүнтэй парламентын анхны намрын чуулган өнгөрөгч долоо хоногт хаалтаа хийв.
УИХ-ын дарга Д.Амарбаясгалан чуулганыг хааж хэлсэн үгэндээ хэлэлцэн баталсан хуулийн төслүүд болоод эдийн засгийн нөхцөл байдлын талаар дурдсан. Олон сэдвийг хөндсөн түүний нэлээн хэдэн минутын илтгэлд ганц л зүйл дурдагдсангүй. Тэр бол "Aqua garden" буюу иргэдийн нэрлэснээс "Авлига хороолол"-ын асуудал.
УИХ-ын даргын илтгэлээс "Авлига хороолол"-ын талаар үг унагах нь уу гэж хүлээсэн нь учиртай.
УИХ-ын дарга өнгөрөгч наймдугаар сард буюу шинээр бүрдсэн парламент ээлжит бусаар хуралдан төсвийн тодотгол хэлэлцэх үеэр анх "Авлига хороолол"-ын талаар ам нээсэн. Шинэхэн парламентын шижигнэсэн дарга галтай цогтой ямар ч сэдэв байна түүнийг барьж авч дуугарчих гээд байж ядаж байсан хэрэг.
Тэрбээр "Засгийн газрын гишүүд, хотын удирдлагууд энэ газар очихоороо олон нийтэд зориулаад “нураана” гэдэг попорсон мэдээлэл өгөөд яваад байдаг. Хоёр жилийн өмнө Ерөнхий сайд очоод голын голдиролд барилга барьж, үерийн эрсдэл үүсгэсэн учир нураа” гэдэг чиглэл өгсөн . Гэтэл түүнийг хойш нэмж зөвшөөрөл өгсөн асуудлыг ил болго гэдэг асуудлыг гишүүд шаардаж байна.
Тиймээс хотын удирдлагууд ямар бодит ажил хийснээ долоо хоногийн дотор УИХ-д ирүүл. Шаардлагатай гэж үзвэл УИХ-ын даргын захирамжаар ажлын хэсэг байгуулаад яг энэ үйл явцыг шалгаж болно. Энэ нь нийгэмд шударга ёс гэж байдаг уу, олон нийтийн эрх ашиг чухал уу гэдгийг харуулах учир үүнд онцгой анхаарч ажиллана.
Ялангуяа Ерөнхий сайдыг ажилласан өдрөөс хойш ямар зөвшөөрөл нэмж өгсөн, хэн өгсөн гэдгийг тодорхой болгох шаардлагатай.
УИХ-д ирүүлэх мэдээлэл хангалтгүй гэж үзвэл намрын чуулганы эхэнд энэ асуудлаар хяналт шалгалтын түр хороо байгуулах болно" хэмээн чуулганы танхимын хоймроос хэлж байв.
Үүнээс 10 хоногийн дараа холбогдох газруудаас УИХ-д ямар нэгэн мэдээлэл очсон эсэхийг лавлахад “Aqua garden хотхонтой холбоотой мэдээлэл одоогийн байдлаар ирээгүй байна.
Намрын ээлжит чуулган эхэлмэгц энэ асуудлыг анхаарна. Шаардлагатай гэж үзвэл хяналтын сонсгол ч хийж болох юм. Хяналтын сонсголыг холбогдох байнгын хорооны шийдвэрээр хийдэг тул намрын чуулган эхлэхийг хүлээж байна” гэдэг хариултыг УИХ-ын Ерөнхий нарийн бичгийн дарга Б.Баасандорж өгсөн.
Гэвч үүнээс хойш бүтэн нэгэн чуулганы хугацаанд УИХ-ын дарга "Авлига хороолол"-ын талаар дуугарсангүй. Өөрийнх нь хэлсэнчлэн "нийгэмд шударга ёс гэж байдаг уу, олон нийтийн эрх ашиг чухал уу" гэдгийг харахаар нийгэм, олон нийт нь хүлээсээр. Д.Амарбаясгалан дарга Засгийн газрын гишүүд, хотын удирдлагуудын нэгэн адил "Авлига хороолол"-ын асуудлаар попорсон мэдээлэл өгөөд өнгөрсөн бололтой.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Үе үе цухалзах болсон Ерөнхийлөгчийг дахин нэр дэвшүүлдэг болох өөрчлөлтийн талаар
УИХ-ын гишүүд "аливаа этгээд" дотор өөрсдийгөө нуугаад, давуу эрхээ хэвээр үлдээх нь
ХУУЛИЙН ТӨСӨЛ: Амьгүй донороос эрхтэн шилжүүлэн суулгасан тохиолдолд ар гэрт нь хөдөлмөрийн хөлсний доод хэмжээг 10 дахин нэмэгдүүлсэнтэй тэнцэх хэмжээний оршуулгын зардал олгоно
Засгийн газар бүрэн бүрэлдэхүүнээрээ Архангай аймагт очиж хуралдах зардал хэд вэ?
ХУУЛИЙН ТӨСӨЛ: Сэтгүүлч гэж хэн болохыг тодорхойлж, төрийн байгууллага дэргэдээ хэвлэл мэдээллийн хэрэгсэл ажиллуулахыг хоригложээ
|
41 СЭТГЭГДЭЛТЭЙ
|
