МӨРӨӨДЛИЙН ЖАГСААЛТ: 2030 он гэхэд авлигын индексээр 110-т орж, импортын эрчим хүчийг бүрэн халж, гадаад жуулчдын тоог 2 саяд хүргэнэ

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын Засгийн газраас дунд хугацаанд буюу тав, таван жилээр хөгжлийн бодлого төлөвлөлтөө боловсруулан Улсын Их Хурлаар батлуулдаг. Энэ дагуу ойрын таван жилд /2026-2030/ хийж, хэрэгжүүлэх төлөвлөгөөгөө Засгийн газар өнгөрсөн оны арваннэгдүгээр сард УИХ-аар батлуулсан билээ. Өөрөөр хэлбэл, Монголын төр ирэх таван жилийн хугацаанд ямар ямар асуудлыг шийдвэрлэж, эерэг үзүүлэлт рүү дөхүүлэх вэ, түүнийгээ хэрхэн дүгнэх вэ гэдгээ тодорхойлсон юм.  

Гэвч тухайн үед буюу 2025 оны төгсгөлд улс төрийн үйл явдал арвинтай, эрх баригч намын талцал хуваагдал төрийн ажлыг зогсоох хэмжээнд хүрээд байв. Энэ үед нийгэм бүхэлдээ зөвхөн хуваагдсан талуудын зөрчил маргаанд анхаарал хандуулж байсан гэхэд хилсдэхгүй. Гэтэл улс төрийн тухайн үеийн халуурлаас гадна ирэх оны төсөв цаашлаад Засгийн газрын ойрын таван жилийн мөрийн хөтөлбөр зэрэг чухал баримт бичгүүдийг хэлэлцэн батлах хуулийн хугацаа тулж ирээд байсан юм.

Нэгэнт дээрх баримт бичгүүдийг батлах заасан цаг хугацааг хуульд заасан байдаг тул хэлэлцсэн болоод л баталсан гэчихэд нэг их буруудахгүй болов уу. Түүнээс хойш өнөөдрийг хүртэлх хугацаанд эрх мэдлийн төлөөх тэмцэл болоод түүнийг дагасан дуулиан шуугиан гол сэдэв хэвээр байснаас Засгийн газрын мөрийн хөтөлбөрийг анхаарах сөхөө төдийлөн байсангүй. Тиймээс Монгол Улсыг 2026-2030 он хөгжүүлэх үндсэн чиглэлд юу тусгасныг нэхэн сануулахын зэрэгцээ Засгийн газрын зарим "мөрөөдөл"-ийг онцолж байна. 

Монгол Улсын Засгийн газар дунд хугацааны бодлогын баримт бичигтээ юу тусгав?

Энэ удаагийн таван жилийн үндсэн чиглэлийг Г.Занданшатар Ерөнхий сайдын кабинет боловсруулсан. Тэр дундаа түүний танхимд Тэргүүн шадар сайд бөгөөд Эдийн засаг, хөгжлийн сайдаар ажиллаж байсан Н.Учрал голлох үүрэгтэй оролцжээ. Харин өдгөө Н.Учрал Ерөнхий сайдын албыг хашиж буй. 

Тэд ирэх таван жилд хийхээр төлөвлөсөн ажлаа найман үндсэн чиглэлд хуваажээ. Найман чиглэлд тусгасан зорилтуудаас онцолбол, 

Хүний хөгжил

• Дундаж наслалтыг 2-оор нэмэгдүүлнэ
• Дундаж давхаргын эзлэх хувийг 20 хувиар нэмэгдүүлнэ

Нийгмийн хөгжил, үндэсний нэгдмэл үнэт зүйл

• Үндэсний нэгдмэл үнэт зүйлсийн үзүүлэлтийг 55 хувьд хүргэнэ
• Нийгмийн сайн сайхан байдлын үзүүлэлтийг 20 хувиар өсгөнө
• Ядуурлын түвшнийг 15 хувьд хүргэнэ

Эдийн засаг, дэд бүтцийн хөгжил

• Эдийн засгийн өсөлтийг 6 хувиас дээш түвшинд тогтвортой хадгална

Байгаль орчин, ногоон эдийн засаг 

• Уур амьсгалын өөрчлөлтийг сааруулж, байгаль орчны гүйцэтгэлийн үзүүлэлтийн оноог 59.0-д хүргэнэ. 

Төрийн бүтээмж, засаглал

• Авлигыг бууруулж, иргэдийн шүүхэд итгэх итгэлийг бэхжүүлнэ
• Зөв засаглалын үзүүлэлтээр эхний 90 орны нэг болно

Бүсийн хөгжил

• Орон нутгийн хөгжлийн үзүүлэлтийг 20 хувиар нэмэгдүүлнэ

Үндэсний өрсөлдөх чадвар

• Монгол Улс өрсөлдөх чадварын үзүүлэлтээр 50 орны нэг болно

Шинжлэх ухаан, технологи, хиймэл оюун

• Дэлхийн мэдлэгийн индексийг 52.4 оноонд хүргэнэ

Товчхондоо ийм.

Төсвийн алдагдал, Засгийн газрын өрийг багасгаж, Монголчуудын визгүй зорчдог улсын тоог нэмж, хүүхдийн хүчирхийлэл, гэмт хэргийг бууруулна 

Засгийн газрын ирэх таван жилийн үндсэн чиглэлд тусгасан уриа, тунхгийн шинжтэй заалтуудыг онцолж байна.