Озеки Хошорюү Дээд зиндаанд хоёр дахиа түрүүллээ
Мэргэжлийн сүмо бөхийн Нэгдүгээр сарын тэмцээний 15 дахь өдөр өнөөдөр өндөрлөлөө.
Тэмцээний сүүлийн өдөр хоёр унаатай байсан Казахстаны бөх Кинбозан гурван унаатай Охотой хүч үзсэн бол озеки Хошорюү С.Бямбасүрэн озеки Котозакүратай хүч үзсэн юм. Улмаар Охо ошидаши мэхээр Кинбозаныг ялсан бол Хошорюү Котозакүраг буулган авснаар тэмцээний ялагчийг нэмэлт барилдаанаар шийдвэрлэх болсон юм.
Нэмэлт барилдаанд Хошорюү С.Бямбасүрэн Кинбозан, Охог дараалан ялснаар Эзэн хааны цомыг хоёр дахиа хүртлээ.
Тэрбээр 2023 оны Долдугаар сарын тэмцээнд мөн 12 даваа, гурван унаатай тэргүүлж, Дээд зиндаанд анх удаа түрүүлж байв.
Түүнээс хойш өнгөрсөн Арваннэгдүгээр сарын тэмцээнд 13 даваа, хоёр унаатайгаар үзүүрлэснээр шинэ оны эхний тэмцээнд түрүүлбэл ёкозүна цолын болзол сонссон билээ.
Сүмогийн Холбооны Ёкозүнагийн зөвлөл өнөөдрийн тэмцээний өмнө ээлжит бус хурлаа хийж, Хошорюүд цол олгох эсэхийг хэлэлцсэн юм. Холбооны зарим гишүүд нь түрүүлбэл ёкозүна цол олгох ёстой гэж үзсэн ч зарим нь бага цолтой бөхөд унасан тул эргэлзэж байгаагаа илэрхийлжээ.
Нэг гишүүн нь түрүүлсэн ч ирэх сарын тэмцээнийг ажиглах ёстой гэсэн санал дэвшүүлсэн.
Түүнд ёкозүна цол олгох эсэхийг ирэх долоо хоногт шийдвэрлэнэ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
14 СЭТГЭГДЭЛТЭЙ
|
