2025 онд хялбар л хуримтлал үүсгэ

Гэрэл зургийг MPA агентлагийн онцгой зөвшөөрөлтэйгөөр ашиглав

Дүгнэлтээрээ эхэлчихье.

• Стандарт цалингаар санхүүгийн эрх чөлөөнд хүрч болно.
• Тогтмол дүнгээр хуримтлуул. Цалингийн 10-15%
• Тууштай хуримтлуул. Сар бүр, өдөр бүр давтамжтай гэсэн үг.
• Урт хугацаанд хуримтлуул. Дор хаяж 10 жил. Хүүгээс хүү боддог хуримтлалыг сонго
• Эцэст нь хуримтлалын хүчийг ашиглан мөнгөө огцом өсгө.

Яагаад гэдгийг дэлгэрүүлж уншаарай.

• Жил бүр сугалаанд найдан банканд 10 сая төгрөг орхиж хаяад өөрийгөө хуримтлалтай гэж бодсон бол та эндүүрчээ.
• Цалин юунд ч хүрэхгүй байна. Хуримтлуулах мөнгө байхгүй гэвэл та бас л эндүүрчээ.
•  Жил бүр банкны өндөр хүү хөөцөлдөж явдаг бол та бас л эндүүрчээ.

Ерөөсөө эцсийн эцэст хүн бүр мөнгөгүй нь мөнгөтэй, мөнгөтэй нь гайгүй өсгөх гээд л байгаа хэрэг. Тэгээд арга эвээ олох гээд л өөрийгөө тэмтчин явсаар нэг мэдэхэд 5, 10 жил өнгөрдөг. Тэгэхээр мөнгөний менежментийн алтан зарчмыг та бүхэнтэй хуваалцъя аа.

Эхний алхам: Урт болон богино хугацааны хуримтлалтай бай.

Яг цалингаараа урсгалаараа яваад байхад ямар ч ирээдүй байхгүй. Угаасаа ингэж байр, машин, мөнгөтэй болно гэдэг худал. Тиймээс урт болон богино хугацааны хуримтлалтай болох хэрэгтэй. Гудамжинд явж буй хэнээс ч асуухад 3, 5, 10 жилийн хугацаатай мөнгө байдаггүй. Манайхан бүгд 1-2 жилийн л мөнгөтэй. Эсвэл дийлэнх нь мөнгө үгүй.

Хоёр дахь алхам: богино хугацаатай мөнгө нь таны урт хугацаатай мөнгийг хамгаална.

За тэгэхээр богино хугацаа гэдэг нь яахав, юмыг яаж мэдэх вэ, асуудал гарахад гээд банкнуудын өгөөж хөөж гүйдэг хадгаламжийг тань хэлж байгаа юм. Энэ бол хүнд тодорхой хэмжээнд байх ёстой. Ер нь бол даатгал л иймэрхүү эрсдэлийг хаадаг юм л даа. Манайхан даатгалыг ашиглаж сураагүй учраас танд богино хугацаатай мөнгө хэлж байгаа юм. Гэхдээ одоо бол хадгаламж богино хугацаанд хүү бага. Гадуур бонд энэ тэр гээд өндөр хүүтэй бүтээгдэхүүн бий шүү.

Гурав дахь алхам: Урт хугацаатай мөнгө бэлд. Таныг санхүүгийн эрх чөлөөнд хүргэнэ.

Урт хугацаатай мөнгө нь таны настай, таны хүүхэдтэй зэрэг өсөх ёстой мөнгө юм. 30 жилийн дараа тэтгэвэрт гарах бол хугацаа нь дор хаяж 20 жил, 3 настай хүүхэд тань 18 хүрэхэд 15 жилийн хугацаатай хуримтлалын тухай ярьж байгаа юм.

Урт хугацааны мөнгө бэлдэх алхам:  

• Зорилго тавь. Дээр хэлсэн шиг урт хугацаанд хүрэх зорилготой байх нь таны хуримтлал цуцлагдахгүй байх гол нууц. Хүн хүүгээсээ урвана гэж үү? Үгүй л болов уу. Зорилгоос тань хуримтлалын хугацаа гарч ирнэ. Ер нь хуримтлалын хүч бол ДОЛООГООС дээш жил дээр процесс нь эхэлдэг.
   
• Цалингаас ядаж 10-15 хувийг хуримтлуул. Хэрвээ эргээд цуцалчих юм шиг санагдаад байвал дүнгээ бүр багасга. Гол нь сар бүр, өдөр бүр ийм хэмжээнд байхад би цуцлахгүй дээ гэж бодсон мөнгөө л тогтмол дүнгээр татуул.
   
• Тууштай бай. Энэ бол цэвэр сэтгэлзүйн асуудал байдаг. Ер нь амьдралдаа тууштай хүн хуримтлал сайн хийдэг. Тууштай биш байлаа ч үүнийг хүндээр хүлээж авахгүй шүд угаадаг шиг хуримтлалыг дадуулах нь чухал. Нэгэнт дадуулсан хүн тууштай байхаас яахав.
   
• Эцэст нь хуримтлалын хүчээр хүүгээ 18 хүрэхэд нь гар дээр нь 300 сая төгрөг тавиад байр, машин, сургалтын төлбөрийг нь бэлдчихсэн сууж байх юм даа. Эсвэл тэтгэвэртээ гарахдаа аялах мөнгөө бэлдээд  сууна.

Дахин дүгнээд хэлэхэд, хүүхдээ 18 нас хүртэл нь бүхэл бүтэн 18 жил өнгөрч байхад цалингийн зээлээр сургалтын төлбөрийг нь төлөх гээд битгий сууж байгаарай. Эргээд таны ийм санхүүгийн зуршилтайг чинь хүү чинь, охин чинь өвлөж авснаар таныг тэтгэврийн зээл авхуулдаг, татаас нэхдэг л нэгэн болно. Үүнийг санхүүгийн үйлийн үр гээд байгаа юм.