Squid game: МОНГОЛ

Гэрэл зургийг MPA агентлагийн онцгой зөвшөөрөлтэйгөөр ашиглав

Squid game нэртэй цувралыг бүгд мэдэх байх. Энэ тоглоом бодит амьдрал дээр ч тохиох аж. Хаана вэ? Монголд...

Цуврал дээр ядаж л тоглоомыг зохион байгуулагч нар нь оролцогч бүрд мөнгө өгч, тоглоомд оролцуулдаг. Харин бодит амьдрал дээр тоглогчдынхоо мөнгөөр тоглодог.

Монголд дэлгэрсэн энэхүү тоглоомын дүрэмтэй танилцъя. Дараах оролцогчидтой.

• Дөрвөлжин – Зохион байгуулагч болох УИХ, Засгийн газраас нийгмийн дүрэм, журмыг батална.
• Гурвалжин – Яамдууд, Хууль хүчний байгууллагууд
• Дугуй – ААН
• Тоглогчид – Монгол Улсын ард иргэд

Тоглоомын зорилго: Энэ тоглоомд бүгд хожно гэх бодол байхгүй. Бүгд хувь хувиа бодно. Өөрсдийн эрх ашгийг хамгийн түрүүнд тавьдаг.

Тоглогчид буюу Монгол Улсын иргэд

Тоглогчид нийгмийн харилцаанд орж амьдарна. Гэр бүл болж, ажил хийж, амьдралаа залгуулна. Тэд орлого олж, татвар төлнө. Тэдний тоглоомоос хүсэх зүйл нь ердөө л тогтвортой, сайхан амьдрал.

Одоогийн дүрмээр,

• Нийгмийн асуудлаа шийдүүлэх зорилготой орлогынхоо 34 хувийг дөрвөлжинд тушаадаг.
• Хөдлөх, үл хөдлөх, санхүүгийн хөрөнгөтэй болох, түүнийгээ хөдөлгөх бүрд татвар төлнө.
• Хохирогчийн дүртэй. Бүх зүйлсийг өөрөөс нь өөр зүйлс хөдөлгөдөг гэж итгэдэг.
• Энэ тоглоомоос гарах юмсан гэж байнга боддог. Боломж гарвал өөр улс руу цагаачлахыг хүсдэг.

Дөрвөлжин буюу УИХ, Засгийн газар

Тоглогчдод зориулан саад тотгор, асуудал үүсгэнэ. Үүссэн асуудлаас мөнгө хийнэ. Томоохон скандал гармагц, дундаас нь мөнгөжих болно. Энэ нь үе үе тоглоомын дүрмийг өөрчлөх замаар оруулж ирнэ. Жишээлбэл,

• Суурь асуудлыг байнга хадгалсаар байх,
• Түгжрэлийг шийдэхгүй
• Утааг шийдэхгүй
• Татварыг нэмнэ
• Ужгирсан ядуурал
• Ажилгүйдэл
• Өндөр инфляц
• Ханшийн уналт

Тэр дундаас ашиг хонжоо хайх,

• Хөгжлийн банк
• Нүүрсний хулгай
• Боловсролын сангийн зээл
• ЖДҮ зээл
• Бусад бүх жижиг хулгайнууд

Гурвалжин буюу Яамдууд, Хууль хүчний байгууллагууд

Тэдний гол үүрэг нь зэвсэгтэй харуул буюу тоглогчдыг хянадаг билээ. Дөрвөлжингөөс ирсэн үүрэг даалгаврыг бодит нөхцөл байдалд хэрэгжүүлнэ. Хэрвээ асуудал үүсэх юм бол тэрийг зохицуулах, тоглогчид элдэв янзын хөдөлгөөн хийхээс сэргийлнэ. Даруй, хүлцэнгүй байхыг шаардана.

Дугуй - ААН

Энэ тоглоомын хамгийн эрх мэдэлгүй, хүчгүй оролцогч. Энэ тоглоомд бүтээгдэхүүн үйлдвэрлэж, ашиг олох зорилготой. Энэ явцдаа маш олон хүндрэл бэрхшээлтэй нүүр тулдаг. Дөрвөлжин нь дугуйг тоглогчдын эсрэг байлгахаар байнга турхирдаг. Зарим дугуй нь дөрвөлжинтэй нэгдэн нийлж байж, өөрийгөө хамгаалж үлддэг. Тэд дараах шимтгэл, татвар төлдөг,

• ААН орлогын албан татвар төлнө
• НДШ төлнө
• НӨАТ төлнө
• Онцгой албан татвар
• Гаалийн татвар
• Бусад

Тоглоомын үр дүн:

Тамын тогоо шиг энэ тоглоомд бүгд л эрх ашгаа нэн тэргүүнд тавьдаг. Харин тоглоомын дүрмийг өөрчилж, хэзээ ч нэг шат хамтдаа ахих бодолгүй. Эргээд бие биенээ гэмтээсээр дуусдаг. Энэ тоглоомоос хамгийн их ашиг ологч нь дөрвөлжин, гурвалжин болон зарим нэг хэлхэлдсэн дугуйнууд юм. Харин тоглогчид бол байнга хохирдог. Тиймдээ ч хохирогчийн сэтгэхүйтэй болж, хичээхээ ч байцгаасан.

Эцэстээ энэ тоглоом, энэ системээс гарах нь буддын шашны гэгээрэх, нирваан дүрийг олох шиг хүнд болжээ.