"Орон сууцны айлууд гурван тарифт тоолуур суурилуулсан тохиолдолд цахилгааны төлбөрийн хэмжээ буурах боломжтой"

Гэрэл зургийг MPA агентлагийн онцгой зөвшөөрөлтэйгөөр ашиглав

Цахилгаан эрчим хүчний хоёр тарифт тоолуурыг гурван тарифт тоолуурт шилжүүлж төлбөрөө бууруулах боломжтой гэж "УБЦТС" ТӨХК-аас мэдэгдээд байгаа. Хоёр тарифт тоолуурыг гурван тарифт руу шилжүүлэхэд тоолуур солихгүй программ дээр холболт хийх юм байна. Тоолуураа өөрчлүүлэх бол харьяа дүүрэг дэх УБЦТС ТӨХК-ийн Хэрэглэгчдэд үйлчлэх төвдөө хандаж захиалга өгнө, төлбөр төлөхгүй. Энэ талаар тус компанийн Борлуулалтын албаны дарга М.Мөнх-Эрдэнээс тодруулсан юм.

-Эрчим хүчний хоёр тарифт тоолуурыг гурван тарифт тоолуур руу шилжүүлбэл бага төлбөр төлөгдөнө гэж мэдээлж байна. Энэ талаар тодорхой тайлбарлаж өгөөч.

-Ахуйн хэрэглэгчийн гурван тарифт тоолуур нь өрхийн цахилгаан хэрэглээг өдрийн 06:00-17:00, оргил ачааллын 17:00-21:00, шөнийн 21:00-06:00 цагуудаар ялгаж тоолдог. Өөрөөр хэлбэл цагийн ялгавартай хэрэглээ нь өөр өөр үнэ тарифаар тооцоологддог.

Зургаар харуулбал:

 

Дээрх зургаас харахад хэрвээ тухайн хэрэглэгч гурван тарифт тоолуур тавиулж, 17:00-21:00 цаг буюу оргил ачааллын цагийн 973 кВт.ц хэрэглээгээ 30%-аар бууруулж, 674 кВт.ц болгосноор 201,794 төгрөгөөр бага төлбөр төлөх бүрэн боломжтой байна.

-Цахилгаан эрчим хүчний төлбөр их гараад байна гэх асуудал гарч байна. Тоолуурыг хэрхэн баталгаажуулдаг вэ, хэрэглээний төлбөрийн бодолтыг хэрэглэгч өөрөө хянах боломж бий юу?

-Цахилгаан эрчим хүчний тоолуурыг төрлөөс нь хамааруулаад дөрөв ба найман жил тутамд баталгаажуулдаг.

Хэрэглэгчийн тоолуурын баталгаат хугацаа дууссан бол харьяа Хэрэглэгчдэд үйлчлэх төвд хандах эсвэл 70047004 утас, УБЦТС ТӨХК-ийн УБЦТС ТӨХК-UBEDN фэйсбүүк хуудасны чатботоор холбогдон тоолуураа хэлхээнээс салгуулах дуудлага өгч, тусгай зөвшөөрөл бүхий дурын лабораторид хандан шалгуулж баталгаажуулна.

Хэрэглэгч  цахим хаягаа харьяа Хэрэглэгчдэд үйлчлэх төвд бүртгүүлснээр сар бүр тооцооны нэхэмжлэл авах, мөн манай компанийн “Цахилгаан хэрэглэгч” аппликэйшнийг гар утсандаа татаж, өөрийн гэрээний мэдээлэл болон төлбөр тооцсон байдал, тоолуурын заалтаа хянах, харах зэргээр хэрэглээний төлбөрийн тооцооллыг хянах бүрэн боломжтой юм.

-Гурван тарифт тоолууртай болсноор орон сууцны айл өрх шөнийн тарифын хөнгөлөлт эдлэх үү?

-Шөнийн тарифын хөнгөлөлтийг тоолуурын тариф хэд байхаас үл хамааран Засгийн газрын 2017 оны 199 дүгээр тогтоол, ЭХЗХ-ны 2024 оны 749 дүгээр тогтоолын дагуу зөвхөн гэр хорооллын хэрэглэгч нарт үзүүлдэг.

Орон сууцны хэрэглэгчийн хувьд гурван тарифт тоолуур суурилуулсан тохиолдолд 17:00-21:00 цаг буюу оргил ачааллын цагийн хэрэглээгээ 30%-аас дээш бууруулбал төлөх төлбөрийн хэмжээ буурах боломжтой.