Абдулрахман Ахмад Аль-Харби: Монгол, Саудын Арабын эдийн засгийн хамтын ажиллагааг өргөжүүлэхэд анхаарч ажиллана

Ерөнхийлөгчийн Тамгын Газар

Саудын Арабын Хаант Улсаас Монгол Улсад хавсран суух Элчин сайд Абдулрахман Ахмад Аль-Харби Монгол Улсын Ерөнхийлөгч У.Хүрэлсүхэд Итгэмжлэх жуух бичгээ өргөн барилаа.

Итгэмжлэх жуух бичгээ өргөн барьсантай холбогдуулан Монгол Улсын Ерөнхийлөгч хүлээн авч уулзан, Элчин сайдаар томилогдсонд нь баяр хүргэв.

Ерөнхийлөгч НҮБ-ын Цөлжилттэй тэмцэх конвенцын Талуудын ээлжит бага хурлуудыг Саудын Арабын Хаант Улс болон Монгол Улс тус тус хүлээн авч зохион байгуулах чиглэлээр олон улсын тавцанд харилцан уялдаатай ажиллаж буйд сэтгэл хангалуун байгаагаа илэрхийлсэн байна.

 

Ерөнхийлөгчийн Тамгын Газар

Цаашид хамтын ажиллагааг худалдаа, эдийн засаг, хөрөнгө оруулалт, уул уурхай, хөдөө аж ахуй, байгаль орчин зэрэг салбарт хөгжүүлэх боломж байгааг тэмдэглэв.

Элчин сайд Абдулрахман Ахмад Аль-Харби Монгол Улсын Ерөнхийлөгчид Саудын Арабын Хаант Улсын Хаан, хоёр ариун сүмийг хамгаалагч Эрхэм дээд Салман бин Абдулазиз Аль-Сауд-ын халуун дотно мэндчилгээг уламжилсан байна.

Мөн Монгол, Саудын Арабын харилцааг улам бэхжүүлэх, ялангуяа эдийн засгийн хамтын ажиллагааг өргөжүүлэхэд онцгойлон анхаарч ажиллахаа илэрхийлсэн гэж Ерөнхийлөгчийн Тамгын Газраас мэдээллээ.

 

Ерөнхийлөгчийн Тамгын Газар