“Президент спорт цогцолбор”-ын техник, эдийн засгийн үндэслэл, зураг төслийг гуравдугаар сард боловсруулж дуусна

Ерөнхийлөгчийн Тамгын Газар

Монгол Улсын Ерөнхийлөгч У.Хүрэлсүх 2022 оны арваннэгдүгээр сард БНХАУ-д төрийн айлчлал хийсэн. 

Энэ үеэр "Ерөнхийлөгчийн нэрэмжит хүүхэд, залуучуудын спорт сургалтын цогцолбор" төслийн техник, эдийн засгийн үндэслэлийн судалгааг хэрэгжүүлэх тухай” хоёр улсын Засгийн газар хоорондын солилцох захидалд гарын үсэг зурсан билээ.

Айлчлалын мөрөөр Монгол Улсын Ерөнхий сайдын захирамж гарч, Монгол Улсын Ерөнхийлөгчийн санаачилсан “Президент спорт цогцолбор” барих төслийн ажилд дэмжлэг үзүүлж, удирдлага, зохион байгуулалтаар хангаж ажиллах Ажлын хэсэг байгуулагдаад байна.

Ажлын хэсгийн дарга, Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ, Ажлын хэсгийн гишүүн, Монгол Улсын Ерөнхийлөгчийн зөвлөх О.Буяннэмэх нар өнөөдөр БНХАУ-аас Монгол Улсад суугаа Онц бөгөөд Бүрэн эрхт Элчин сайд Цай Вэньруй-тай уулзаж, төслийн ажлын явцын талаар санал, мэдээлэл солилцлоо.

Уулзалтын үеэр Монголын талаас төслийн хүрээнд хийж хэрэгжүүлж буй ажлуудын талаар мэдээлэл өгөв. Тухайлбал, “Президент спорт цогцолбор”-ын техник, эдийн засгийн үндэслэл, зураг төсөл боловсруулах ажил одоогоор 75 хувийн гүйцэтгэлтэй байгаа бөгөөд ажлын зураг энэ оны гуравдугаар сард бүрэн гарна.

Элчин сайд Цай Вэньруй спорт цогцолборын төслийн ажлын явцын талаар БНХАУ-ын холбогдох байгууллагад мэдээлэл хүргүүлж, хэрэгжилтийн явцыг бүх талаар дэмжин ажиллахаа илэрхийлэв.

Хоёр талын хамтын ажиллагааны хүрээнд БНХАУ-ын талаас шинжээчдийн баг хүрэлцэн ирж ажиллах бөгөөд төслийг богино хугацаанд, өндөр гүйцэтгэлтэй хэрэгжүүлэхийн тулд нягт хамтран ажиллахаар тохиролцлоо гэж Ерөнхийлөгчийн Тамгын Газраас мэдээлэв.