"Эрчим хүчний салбарын туршлагатай ажилчид цалингаа голоод харийн оронд боолын хөдөлмөр эрхлэхээр явж байна"
Эрчим хүчний салбарын ажилтнуудад тулгамдаж буй асуудал болон Монголын Эрчим хүч, геологи, уул уурхайн үйлдвэрчний эвлэлийн холбооны удирдлагуудын хариуцлагагүй үйлдлүүдийн талаар Дулаан цахилгаан үйлдвэрлэгч, түгээгчдийн ҮЭ-ийн холбооноос өнөөдөр Үндэсний мэдээллийн төвд мэдээлэл хийлээ.
Тус холбооны дарга н.Адьяасүрэн “Манай холбоо холбогдох хуулийн заалтыг үндэслээд ДЦС IV, ДЦС II, Эрдэнэтийн дулааны цахилгаан станц, Хасу Мегаватт ХХК, Дорнод бүсийн эрчим хүчний хороо нийлж Дулаан цахилгаан үйлдвэрлэгч түгээгчдийн үйлдвэрчний эвлэлийн холбоог байгуулсан.
Албан ёсоор 2022 оны арваннэгдүгээр сараас үйл ажиллагаа явуулж байна.
Манай эрчим хүчний салбарын ажилчдын цалин хөлс тарифын хэлэлцээрээр тогтоогддог. Уг хэлэлцээр 2019 оноос хүрсэн түвшнээс буурснаас болж, энэ салбар өнөөдөр ажиллах хүчингүй, мэргэжлийн боловсон хүчний хомсдолтой байдалд хүрэхэд голлон нөлөөлсөн.
Дулаан цахилгаан үйлдвэрлэгч түгээгчдийн ҮЭ-ийн холбоо байгуулагдсан шалтгааны хувьд:
- Эрчим хүч тэр дундаа хүнд үйлдвэрийн салбарт мэргэжилтэй боловсон хүчнийг ажиллуулахад 2-5 жилийг зарцуулдаг. Туршлагатай, мэргэжилтэй ажилчид маань цалин хөлсөө голоод, харийн оронд боолын хөдөлмөр эрхлэхээр эрчим хүчний салбарыг орхин явж байна. 2022 онд Дулааны IV цахилгаан станцаас 212 хүн цалин хөлсний үнэлэмж буурсантай холбоотойгоор ажлаасаа гарсан.
- Монголын эрчим хүч, геологи, уул уурхайн үйлдвэрчний эвлэлийн холбоо аль аль салбарынхаа ажиллагчдын асуудлыг орхигдуулж байгаа нь манай холбоо байгуулагдах өөр нэгэн шалтгаан болсон.
- Монголын уул уурхай үйлдвэрчний эвлэлийн холбоо өөрийн дүрмийг маш ноцтойгоор зөрчдөг. Алдаагаа залруулах шаардлагыг удаа дараалан тавьсан ч залруулаагүй. Монголын уул уурхай үйлдвэрчний эвлэлийн холбооны санхүү ажилчдын мөнгөнөөс бүрдэж байхад зарцуулалт нь ил тод байх ёстой. Асуудал дотооддоо шийдэгдээгүй тул бид Эрүүгийн цагдаагийн газар хандсан. Энэ Асуудал нь санхүүгийн шинжээчээр нотлогдоод өнөөдөр АТГ-т эрүүгийн хэрэг үүсэн шалгагдаж байна.
"Эрчим хүчний сайдад эрчим хүчний салбарын ажилчдыг харж үзэхийг хүссэн шаардлагыг хүргүүлж байна"
Дорнод бүсийн эрчим хүчний систем ТӨХК-ийн ҮЭ-ийн хороон дарга н.Гүнсмаа “Эрчим хүчний салбарын ажилчдын цалинг 10 хувь нэмж байгааг салбарын ажилчид хүлээн зөвшөөрөхгүй байгаа. Учир нь энэ 10 хувь амьдралд нийцэхгүй. Иймээс Эрчим хүчний сайдад эрчим хүчний салбарын ажилчдыг харж үзэхийг хүссэн шаардлагыг хүргүүлж байна” гэлээ.
