Дулаан Шийдэл төслийн нээлтийн үйл ажиллагаа арванхоёрдугаар сарын 7-нд зохион байгуулагдлаа

Монгол Улсын хэмжээнд, тэр дундаа нийслэл Улаанбаатар хотод агаарын бохирдол нэн тулгамдсан асуудал ба Монгол Улсын Засгийн газар агаарын бохирдлыг гамшгийн хэмжээнд хүрснийг 2017 онд зарлажээ.

Aгаарын бохирдлыг бууруулахад гэр хороололд амьдарч буй иргэдийн хувийн сууцны дулаан алдагдлыг багасгах нь нэн чухал бөгөөд энэ хүрээнд Европын Холбооны Свич-Эшиа хөтөлбөрийн санхүүжилттэй Дулаан Шийдэл төсөл 2018-2022 онд хэрэгжиж, нийт 1,546 айл өрх эрчим хүчний хэмнэлттэй дулаалгын шийдлүүдийг хэрэгжүүлж, нүүрсхүчлийн хийн ялгаруулалтыг 3,556 тонноор бууруулжээ.

Тэгвэл тус төслийн хоёрдугаар үе шат болох Дулаан Шийдэл 2 төсөл нь Европын Холбооны Свич-Эшиа хөтөлбөр, Абби Пиер сан, ГАГГА сан болон Францийн хөгжлийн агентлагийн санхүүжилттэйгээр  хувийн сууцны салбар дахь тогтвортой хэрэглээ ба үйлдвэрлэл руу чиглэсэн бодлогыг дэмжих, Монголын нөхцөлд нийцсэн, үр ашигтай эрчим хүчний шийдлүүдийг боловсруулан нэвтрүүлэх, хүлэмжийн хийн ялгарлыг бууруулахад хувь нэмрээ оруулах болон эрүүл мэнд, эдийн засаг, нийгмийн хувьд үр ашигтай байх зах зээлийг бий болгох зорилго доор 2022  хэрэгжиж эхэллээ.

Дулаан Шийдэл 2 төслийн нээлтийн үйл ажиллагаа 12 дугаар сарын 7-ны өдөр зохион байгуулагдаж, төслийн хүрээнд хийгдэж буй ажил, хүлээгдэж буй үр дүн, цаашдын алхмуудыг хэлэлцэж, гарын доорх материал ашиглан хямд, хялбар аргаар байшингаа дулаалах Хялбар Шийдэл аяны хүрээнд эрчим хүчний хэмнэлттэй шийдэл хэрэгжүүлсэн айл өрхүүдтэй танилцлаа.

 

Бүгд Найрамдах Франц улсаас Монгол улсад суугаа Онц бөгөөд бүрэн эрхт Элчин Сайд Себастиан Сүрүн, Европын Холбооноос Монгол Улсад суугаа Төлөөлөгчийн газрын Улс төрийн асуудал хариуцсан атташе Паола Вестлунд, Жэрэс ОУТББ-ын Монгол дахь Суурин төлөөлөгч Элиан Жарри нар үйл ажиллагааг нээж, хувийн хэвшил, санхүүгийн байгууллага, иргэний нийгмийн байгууллага, олон улсын байгууллага болон төсөл хэрэгжүүлэгч байгууллагын нийт 60 гаруй төлөөлөл оролцлоо.

 

Дулаан шийдэл төслийн хүрээнд бид иргэдийг барилгын бригад, барилгын материал нийлүүлэгч, санхүүгийн байгууллага, эрчим хүчний аудитор, удирдлагуудтай холбосон дулаалгын зах зээлийн загварыг бий болгож чадсан хэмээн Жэрэс ОУТББ-ын Монгол дахь Суурин төлөөлөгч Элиан Жарри хэллээ. Тэгвэл бид ирэх дөрвөн жилийн хугацаанд олон талт хамтын ажиллагаагаа өргөжүүлэх нь зах зээлийн загварыг бэхжүүлж, Монгол улсад агаарын бохирдлыг бууруулахад хувь нэмрээ оруулахад чухал ач холбогдолтой.

Дулаан Шийдэл-2 төсөл нь дөрвөн жилийн хугацаанд нийт 5,900 айл өрхийг дулаалах, 160 БЖДБ эрхлэгчдийг чадавхжуулах, нүүрсхүчлийн хийн ялгарлыг 17,700 тонноор бууруулах зорилготой ба төслийг Жэрэс ОУТББ, ШУТИС-ийн дэргэдэх Барилгын эрчим хүч хэмнэлтийн төв, Монголын Барилгын үндэсний ассоциац ТББ, Монголын Ногоон Санхүүгийн Корпорац, Монголын Эмэгтэйчүүдийн Сан хамтран хэрэгжүүлж байна.

Төсөл удирдан хэрэгжүүлэгч Жерес ОУТББ-ын тухай

Жэрэс ОУТББ нь Франц улсад төвтэй эрчим хүч, хөгжлийн чиглэлээр мэргэшсэн ТББ бөгөөд Европ, Африк, Азийн орнуудад 40 гаруй жилийн хугацаанд хамгийн эмзэг хүмүүсийн амьдрах нөхцөлийг сайжруулах, уур амьсгалын өөрчлөлт болон түүний нөлөөтэй тэмцэх чиглэлээр үйл ажиллагаа явуулдаг.