Нүүрсний хулгайн асуудлаар нээлттэй сонсгол явуулахыг ерөнхийлөгч У.Хүрэлсүх уриаллаа
Нүүрсний хулгайн хэрэгт холбогдсон албан тушаалтнуудад хариуцлага тооцохыг иргэд шаардаж байгаа. Уг асуудлыг эцэслэн шийдэх талаар Засгийн газрын тэргүүн өнөөдөр хэвлэлийн хурал хийсэн бол Ерөнхийлөгч У.Хүрэлсүх албан ёсны цахим хаягаараа байр сууриа илэрхийлжээ.
Тэрбээр "Нүүрсний хэргийн асуудлаар Монгол Улсын Их Хурал дээр нээлттэй сонсгол хийж ард түмэнд ил тод мэдээлэх нь зүйтэй. Нөхцөл байдалд бодитой дүгнэлт хийж хатуу чанд хуулийн хариуцлага тооцох ёстой" гэжээ.
Зарим иргэн өнөөдөр Төв талбайд цугларч нүүрсний хулгайн асуудлаар үзэл бодлоо илэрхийлсээр байна.
Тавантолгойн ордоос 385,000 тонн нүүрс хулгайд алдагдсан бөгөөд дугааргүй машин, өөр дугаар зүүсэн, хоосон гарсан гэж бүртгэгдсэн машин гэх зэргээр тээвэрлэгдэн гарсан байна гэдэг нь тогтоогдсон хэмээн ЗГХЭГ-ын дарга Д.Амарбаясгалан мэдээлж байв. Энэ хэрэгт нэр бүхий УИХ-ын гишүүн, ЭТТ компанийн удирдлагууд гээд 10 хүн холбогдсон болохыг өчигдөр зарлаад байгаа билээ.
