Замын-Үүд-Эрээн өртөөний галт тэрэг солилцоо нэмэгдэж, Эрээн өртөөнд 15 галт тэрэг хүлээлгэн өгчээ

“Улаанбаатар төмөр зам” ХНН өчигдөр Замын-Үүд-Эрээн өртөөний өргөн царигаар Хятадын талд 15 галт тэрэг хүлээлгэн өглөө.

Цар тахлын халдварын улмаас Хятадын тал галт тэрэг солилцоог олон сараар огцом бууруулаад байсныг УБТЗ-ын зүгээс Хятадын талтай зөвшилцөж, шаргуу ажилласны үр дүнд 9 дүгээр сарын 24-ний өдрөөс галт тэрэг солилцоо хоногт 14 болж хэвийн хэмжээндээ хүрээд байсан юм.

Харин Замын-Үүд–Эрээн өртөөний өргөн царигаар Хятадын талд 15 галт тэрэг өгсөн явдал нь цаашид галт тэрэг солилцоо өсөх боломж нөхцөл бүрдсэнийг харуулж байна.

Галт тэрэг солилцоо нэмэгдсэнээр манай улсын экспортын тээврийн хэмжээ нэмэгдэж эдийн засагт эерэг үр дүн үзүүлэх юм.

Эх сурвалж: "УБТЗ" ХНН