Гэрэл зургийг MPA агентлагийн онцгой зөвшөөрөлтэйгөөр ашиглав

Томуу, томуу төст өвчин болон менингококкын нөхцөл байдлын талаар Халдварт Өвчин Судлалын Үндэсний Төв (ХӨСҮТ)-өөс өнөөдөр мэдээлэл хүргэлээ. 

Ханиад томуугийн өнөөгийн нөхцөл байдлын талаар ХӨСҮТ-ийн эмч Ч.Уртнасан дараах мэдээллийг танилцуулав. 

Тэрбээр хэлэхдээ "Улсын хэмжээнд томуу, томуу төст өвчний тархалт дэгдэлтийн буюу улаан түвшинд хүрсэн. 

Орон нутгаар авч үзвэл:

• Улбар шар түвшинд долоон аймаг,
• Аймгийн хэмжээний дэгдэлт буюу улаан түвшинд 13 аймаг,
• Тахал, тархалтын түвшинд нэг буюу Дорноговь аймаг оржээ.

Амбулаторийн нийт үзлэгийн 14 орчим хувийг томуу, томуу төст өвчин эзэлж байна.

Эмнэлэгт хэвтэн эмчлүүлж буй хүмүүсийн 38 орчим хувь нь амьсгалын замын цочмог хүнд халдвар, уушгины үрэвсэлтэй. 

Өвчлөлийн ерөнхий нөхцөл байдлыг харахад өмнөх долоо хоног болон өнгөрсөн оны мөн үеэс нэмэгдсэн. Тодруулбал эмнэлгийн орны ачаалал 2-3 дахин өссөн.

Насны хувьд: 

Томуу, томуу төст өвчний 75 орчим хувийг 15 хүртэлх насны хүүхдүүд, тэр дундаа тав хүртэлх насны хүүхдүүд 40 хүртэлх хувийг эзэлжээ. 

Амьсгалын замын цочмог хүнд халдвар буюу уушгины үрэвслээр хэвтэн эмчлүүлэгсдийн 80 орчим хувь нь 15 хүртэлх насныхан байна. Үүнээс 50 орчим хувь нь дөрөв хүртэлх насны хүүхдүүд байгаа юм.

Улсын хэмжээнд 2,300 орчим орыг дэлгэн ажиллуулж байна. Нийслэлд хүүхдийн орны ачааллыг бууруулахын тулд Эрүүл Мэндийн Яамны харьяа эмнэлгүүдэд нэмэлтээр ор дэлгэсэн" гэлээ. 

"КОВИД маш бага тархалттай буюу тав хүрэхгүй хувийг эзэлжээ"

Үндэсний хэмжээнд хийсэн вирус судлалын тандалтын дүнг ХӨСҮТ-ийн Вирус судлалын лабораторийн эрхлэгч Ц.Наранзул танилцуулав. 

Энэ талаар "Нийт хүн амын 69.2 хувьд нь томуу, томуу төст вирусийн тархалт байна. Вирусийн тархалтыг хувиар илэрхийлбэл:

• Амьсгалын замын синцитиал вирус 22 хувь
• Томуугийн H1N1 дэд хэв шинжийн вирус 22 хувь
• Рино вирус 14 хувьтай тархалт үүсгэж давамгайлах байр суурийг эзэлж байна.

Мөн нэмэгдээд адино вирусийн идэвхжил таван хувьтай тохиолджээ. 

Томуу, томуу төст өвчин нь хүндэрсэн шалтгаанаар эмнэлэгт хэвтэн эмчлүүлж буй 0-4 хүртэлх насны хүүхдүүдийн вирусийн шалтгааныг тодорхойлсон. Үүнээс үзэхэд 

• 50 хувь нь H1N1 вирус
• 50 хувь нь амьсгалын замын синцитиал вирусээр өвдсөн тандалтын дүн гарлаа. 

Харин КОВИД маш бага тархалттай буюу тав хүрэхгүй хувийг эзэлжээ. Нийт зургаан төрлийн вирусийн халдварын тохиолдол бүртгэгдэж байна" хэмээн хэлэв.