Баянзүрх дүүргийн нутаг дэвсгэр Шархад орчмоор агаар МАШ ИХ бохирдолтой байна

Гэрэл зургийг MPA агентлагийн онцгой зөвшөөрөлтэйгөөр ашиглав

Өнөөдөр 09:15 цагийн байдлаар Улаанбаатар хотын агаарын бохирдол их байна.

Баянгол дүүрэг, МҮОНРТ орчмоор агаар их бохирдолтой бол Баянзүрх дүүргийн нутаг дэвсгэр Шархад орчмоор маш их бохирдолтой байгааг индекс харууллаа.

Толгойт, Нэгдүгээр хороолол, Баруун дөрвөн зам, Хайлаастад бохирдолтой түвшинд хүрчээ.

 

Байгаль орчин, хэмжилзүйн төв лабораторийн хэлтсээс Улаанбаатар хотын агаарын чанарын үзүүлэлтүүдийг хэрхэн хэмждэг тухай тайлбарласнаар стандартаараа хамгийн их бохирдол 500-аас их гэж харагдах ба 500-аас их болсон тохиолдолд тоогоор харагдахгүй. 500-аас дээш бол агаарын бохирдол маш аюултай түвшинд хүрснийг илтгэдэг байна.

Зөвлөмж:

Агаарын чанарын индекс 101-200 буюу бага бохирдолтой үед хэт мэдрэг хүмүүсийн эрүүл мэндэд сөрөг нөлөөлөл илрэх бөгөөд зүрх, судас, амьсгалын замын архаг өвчтэй ялангуяа гуурсан хоолойн багтраа өвчтэй хүмүүс нөлөөлөлд илүү өртдөг тул гадаа биеийн хүчний хүнд хүчир ажил хийх, гадаа явах хугацаагаа багасгах, авто замаас хол явахыг зөвлөв.

Харин агаарын чанарын индекс бохирдолтой буюу 201-300 хүрэхэд хүний эрүүл мэндэд сөрөг нөлөө илэрч, хэт мэдрэг хүмүүст сөрөг нөлөөлөл хүндээр илэрдэг байна. Иймд архаг хууч өвчтэй хүмүүс даралтаа хэмжих, гадаа удаан хугацаагаар явахгүй байх, амны хаалт зүүх шаардлагатай байна.