Нийслэл болон Хөвсгөлд япон хэлний сургалтын төв ажиллуулж буй Таэко Иманагад Улаанбаатар хотын “Хүндэт тэмдэг” олголоо

Ulaanbaatar.mn

Монгол-Японы боловсрол, соёлын хамтын ажиллагааг хөгжүүлэх, боловсролын байгууллагуудын хамтын ажиллагааг өргөжин тэлэх, хүмүүнлэгийн солилцоог идэвхжүүлэх, хоёр ард түмний найрсаг хамтын ажиллагаа, харилцан ойлголцлыг гүнзгийрүүлэхэд оруулсан хувь нэмрийг үнэлэн Япон улсын иргэн Таэко Иманагад Улаанбаатар хотын “Хүндэт тэмдэг” олголоо.

Шагналыг Нийслэлийн Засаг даргын эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн гардуулсан юм.

Түүний санаачилгаар байгуулагдсан сургалтын төвд өдгөө ахлах ангийн сурагчид хамрагдан япон хэлний зохих мэдлэгийг эзэмшин “Янагигаүра” ахлах сургуульд элсэн амжилттай суралцан сурлага, спортын амжилтаараа Япон оронд Эр орныхоо нэрийг өндөрт өргөж буй.

Монгол, Японы боловсрол, соёлын хамтын ажиллагааг гүнзгийрүүлэн хөгжүүлэхэд дан ганц төр засгийн үйл ажиллагаа бус хоёр улсын иргэд, боловсролын байгууллагууд хоорондын хамтын ажиллагааг хөгжүүлэх нь чухал гэдгийг Хатагтай Таэко Иманага онцлон үзэж, хамтын ажиллагааг өргөжүүлэн, идэвх зүтгэл гаргасаар байгаа билээ.

 

Ulaanbaatar.mn

Эх сурвалж: Нийслэлийн сургалт, судалгаа, олон нийттэй харилцах газар