"Төрөөд сар болж байгаа хүүг өргүүлнэ..." гэх зарыг цагдаагийн байгууллагаас шалгаж байна
"Төрөөд сар болж байгаа хүүг өргүүлнэ. Авах хүн байвал аваарай. Тэжээж өсгөхөд бэрх байна" гэсэн зар фэйсбүүк дэх зарын групп хуудсанд тавигджээ.
Уг мэдээллийн мөрөөр цагдаагийн байгууллага бусад холбогдох байгууллагуудтай хамтран шалгалтын ажиллагааг эхлүүлсэн талаар албаны эх сурвалж хэллээ.
Мөн Гэр бүл, хүүхэд, залуучуудын хөгжлийн газраас тухайн хэрэг дээр ажиллаж эхэлсэн байна.
Гэр бүлийн тухай хуулийн 38 дугаар зүйлийн 1 дэх хэсэгт эцэг, эх нь насанд хүрээгүй болон насанд хүрсэн боловч хөдөлмөрийн чадваргүй хүүхдээ тэжээн тэтгэх үүрэгтэй гэхчлэн хүүхэд хамгааллын талаар тодорхой заалтуудыг тусгасан байдаг.
Мөн Эрүүгийн хуулийн 16 дугаар зүйлийн 11 дүгээр хэсэгт эцэг, эх, асран хамгаалагч, харгалзан дэмжигч хуулиар хүлээсэн асран хамгаалах үүргээ биелүүлээгүйн улмаас хүүхдийн эрүүл мэндэд хүндэвтэр хохирол учирсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэх хуулийн зохицуулалт бий.
