Багануур дүүрэгт орсон усархаг борооны улмаас зургаан айлын гэр, хоёр байгууллагын зоорийн давхар үерт автжээ
Багануур дүүрэгт өнөөдөр буюу долдугаар сарын 12-ны 14:30 цаг орчимд 15 минут үргэлжлэн орсон усархаг борооны улмаас үер буужээ.
Улмаар тус дүүргийн 4 дүгээр хороонд байрлах үерийн далан хальж, зургаан айлын гэр, хоёр байгууллагын зоорийн давхар үерт автсан байна. Энэ тухай дуудлагын дагуу Онцгой байдлын хэлтэс, Засаг даргын тамгын газар, холбогдох газрын алба хаагчид айлуудын цахилгааныг салган аюулгүй болгож, усыг шавхан соруулан даланг сэргээн засварлаж, нэг айлыг нүүлгэн шилжүүлэх ажлыг зохион байгуулан ажиллаж байна гэж Багануур дүүргийн Онцгой байдлын хэлтсээс мэдээллээ.
Иргэд та бүхэн үер усны аюулаас сэрэмжилж, болзошгүй эрсдэлээс хамгаална уу. Түүнчлэн гол мөрний ойролцоо амарч, аялж зугаалахдаа аюулгүй байдлаа хангахыг зөвлөж байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
