"The MongolZ"-ийн хөвгүүд "DRILLAS" багийг хожсоноор $1.2 саяын шагналын сантай ДАШТ-д оролцох эрх авлаа

hltv

Counter Strike-2 (CS2) тоглоомын энэ оны хоёр дахь Дэлхийн Аварга Шалгаруулах Тэмцээн (ДАШТ) буюу "Perfect World Shanghai Major 2024" ирэх сард Хятадын Шанхай хотод зохион байгуулагдана. 

1.2 сая ам.долларын шагналын сантай тус тэмцээний урьдчилсан шатны тоглолтууд Шанхай хотод болж байна. Манай улсын "The MongolZ" багийн хувьд өчигдөр эхний тоглолтдоо Индонез улсын "Alter Ego" багийг хожсон.

Ингэснээр ДАШТ-д оролцох эрхийн төлөөх тоглолтоо "DRILLAS" багийн эсрэг хийж, 2:1 онооны харьцаатай ялалт байгууллаа. Уг тоглолтын эхний "Mirage map" дээр манай баг хамгаалах талаасаа ердөө хоёр үеийг авсан. Үргэлжлүүлэн довтлох талаасаа есөн үе авсан хэдий ч 11:13-аар хожигдсон. Тэгвэл хоёр дахь "Ancient map" дээр  өрсөлдөгчөө 13:2-оор илт давуу буулган авсан.

Харин сүүлийн "Anubis map" дээр довтлох талаасаа 10:2-оор байраа сольсон юм. Улмаар хамгаалах талаасаа сайн тоглож, 13:5 онооны харьцаатай ялалт байгуулж чадлаа.

Ийнхүү "HLTV"-ийн дэлхийн чансааны есдүгээр байрт бичигдэж буй "The MongolZ" баг энэ сарын 30-наас арванхоёрдугаар сарын 15-н хүртэл зохиогдох "Perfect World Shanghai Major 2024"-д оролцох эрхтэй болж байна.