АНУ-ын дээд шүүх иргэдийнхээ галт зэвсэг эзэмших эрхийг хамгааллаа

Өчигдөр АНУ-ын дээд шүүх олон нийтийн газарт галт зэвсэг биедээ авч явах иргэдийн эрхийг хязгаарласан Нью-Йорк мужийн хуулийг хүчингүйд тооцох шийдвэр гаргалаа.

Ингэснээр тус мужийн иргэд олон нийтийн газарт өөрийгөө хамгаалах зорилгоор галт зэвсэгтэй явах бүрэн эрхтэй болж байна.

Ижил төстэй хязгаарлалт тавьсан бусад мужуудад хэрэгжиж байгаа хууль дүрмүүд ч дээд шүүхийн шийдвэрийн дагуу цуцлагдах юм.

Ойролцоогоор АНУ-ын мужуудын дөрөвний нэг орчмын хууль дүрэмд уг шийдвэр нөлөөлөхөөр байна.

Нью-Йорк мужийн хуулийн дагуу олон нийтийн газарт галт зэвсэг биедээ авч явахын тулд иргэдээс тодорхой хүндэтгэх шалтгаан шаарддаг байсан юм. Гэтэл ингэж шаардах нь АНУ-ын үндсэн хуульд заасан иргэний эрхийг зөрчиж байна гэж дээд шүүх дүгнэжээ.

АНУ-ын дээд шүүхийн Бүгд Найрамдах Намын зургаан шүүгч олонхын саналаар шийдвэрийг гаргаж, Ардчилсан Намын гурван шүүгч эсэргүүцсэн байна.

Дээд шүүхийн шийдвэр Америкийн нийгэмд галт зэвсгийн асуудал хурцаар яригдаж буй цаг үед гарч байгаа юм.

Хоёр гол намын улс төрчид галт зэвсгийн хяналтыг чангатгах хуулийн төслийг саяхан Сенатад өргөн барихаар санал нэгдээд байгаа.

АНУ-ын ерөнхийлөгч Жо Байден дээд шүүхийн шийдвэрт “гүнээ харамсаж” байгаагаа илэрхийлжээ.

Нью-Йорк хотын захирагч Эрик Адамс өөр арга замаар галт зэвсгийн хэрэглээг хязгаарлахаа амласан байна.

“Бид Нью-Йоркийг зэрлэг өрнөд болгохыг зөвшөөрөхгүй” гэж тэр мэдэгджээ.

АНУ-ын галт зэвсгийн гол лобби байгууллага болох NRA (National Riffle Association) дээд шүүхийн шийдвэрийг талархан хүлээж авч буйгаа илэрхийлсэн байна.

АНУ даяар 390 сая гаруй галт зэвсэг иргэдийн гар дээр байдаг гэсэн тоо бий. Зөвхөн 2020 онд аллага, амиа хорлолт, осол эндэгдэл зэргийг оролцуулаад 45,000 гаруй америк хүн галт зэвсгээс үүдэлтэйгээр амиа алджээ.

Эх сурвалж: BBC