Гэрэл зургийг MPA.mn

Харшлын гаралтай өвчин, үүнээс урьдчилан сэргийлэх талаар Арьсны өвчин судлалын үндэсний төвийн захирал, клиникийн профессор Ц.Уранчимэг зөвлөгөө, мэдээлэл хүргэв. Тэрбээр "Монголын харшил судлаачдын нийгэмлэгийн судалгаагаар таван хүн тутмын нэг нь харшлын өгүүлэмжтэй байна. Мөн хүн амын 40 орчим хувь нь ямар нэгэн байдлаар харшлын гаралтай өвчнөөр өвдсөн тухай холбогдох судалгаанд дурдсан байдаг" гэв.

"Удамшил болон хүрээлэн буй орчноос шалтгаалж харшил үүсдэг"

Мөн тэрбээр "Сүүлийн үед харшлын гаралтай арьсны өвчин болон амьсгалын дээд замын харшлууд цөөнгүй тохиолдож байгаа. Харшил үүсэхэд гадаад, дотоод хүчин зүйлүүд нөлөөлдөг. Удамшил болон хүрээлэн буй орчноос шалтгаалдаг гэсэн үг. Тухайлбал, 

• Эцэг эх нь хоёулаа харшилтай бол хүүхдэд нь 70 хүртэлх хувь
• Аль нэг нь харшилтай бол хүүхдэд нь 50 хувь тохиолдох магадлалтай байдаг. 

Үүнээс гадна ахуйн хэрэглээний химийн бодис, агаарын бохирдол, тоос шороо гэхчлэн олон хүчин зүйл цогцоор үйлчилж гаднын нөлөөтэй харшил үүсэх эрсдэлтэй" гэдгийг хэлсэн юм. 

"Ургамлын тоосны харшил 4-6 дугаар саруудад зонхилон тохиолддог"

Урин дулааны улиралд ургамлын тоосны харшлын өвчин нэмэгдэх хандлагатай байдаг талаар тэрбээр ярилаа. Энэ талаар "Сүүлийн жилүүдэд манай төв дээр ургамлын тоосны харшил, амьсгалын дээд замын өвчлөлтэй хүмүүс цөөнгүй ирж байна.  Ургамлын тоосны харшил нь хаврын улиралд буюу 4-6 сарын эхэн үе хүртэл зонхилон тохиолддог. Түүнчлэн үет ургамлын харшил (Зун 6-7 сарын дунд үе хүртэл), хогийн ургамлын харшлын (Зун 7-9 сарын эхэн үе хүртэл) өвчлөл нэмэгддэг" хэмээн мэдээлэл өгөв.

Хэрэв та ургамлын харшилтай бол дараах зүйлсийг анхаарах шаардлагатай. Үүнд

• Хувийн хамгаалах хэрэгсэл маск, нүдний шил, малгай тогтмол хэрэглэх
• Ургамлын тоосжилт ихэсдэг цагууд (04:00-10:00, 17:00-22:00)
• Борооны дараа гадуур явахгүй, гэртээ байж хаалга цонхоо хаах. Цонх онгойлгосон үед нойтон марлаар хаалт хийх эсвэл цонхонд шүүлтүүртэй тор хийх
• Гэр, ажлын тасалгаанд цэцэг тарихгүй байх
• Хурц үнэртэй зүйлсээс татгалзах (арц, хүж, тамхи, утаа, ариутгалын бодис, хлорамин гэх мэт )
• Даавуун дэр дэрлэх, будаа, самар, буурцаг, цай, хушга, өдөн дэр тохиромжгүй.