Г.Амартүвшин: Зээлийн хүү буураагүй, хүртээмж нь муу байна гэдэг хардлага бий
УИХ-ын Эдийн засгийн байнгын хорооны хуралдаанаар “Зээлийн хүүг бууруулах стратеги бууруулах тухай” УИХ-ын тогтоолын хэрэгжилтийн явцтай танилцлаа.
Танилцуулгатай холбогдуулан гишүүд асуулт асууж, хариулт авав.
УИХ-ын гишүүн Г.Амартүвшин: Зээлийн жигнэсэн дундаж хүү буурсан харагдаж байна. Үүн дотор хэрэглээний зээлийн багцын дундаж хүү хэд байгаа вэ. Иргэдийн зүгээс зээлийн хүү буураагүй гэдэг зүйлийг хэлж байгаа.
Хоёрдугаарт, ипотекийн зээлийн дундаж хүү ямар түвшинд байна.
10 их наядын хөтөлбөрийн хүрээнд арилжааны банкууд шинэ зээл гэхээс илүү өмнө гаргасан зээлээ дахин санхүүжүүлсэн хэмжээ нь ямар түвшинд байгаа вэ. Жилийн 18 хувийн хүүгээр тооцож зээл авсан аж ахуйн нэгжүүд түүнийгээ бууруулаад зээлийн хүүгийн хувьд хэмнэлт хүртэж байгаа. Энэ нь тухайн аж ахуйн нэгждээ дэмжлэг болж байгаа болохоор эдийн засаг болон нийт хэрэглэгчдэд зээлийн хүүгийн дарамтыг бууруулсан эсэх дээр эргэлзэж байна. Үүнд тодорхой хариулт өгнө үү.
Мөн гаднын санхүүжилтийн эх үүсвэрийг ямар хэмжээнд татан төвлөрүүлж чадаж байгаа вэ. Энэ нь зээлийн хүүг бууруулахад тодорхой хэмжээнд нэмэр болдог.
Банкууд муудсан аж ахуй нэгжийн зээлэн дээр барьцаа хөрөнгөөр хангуулах гэж нэлээд уддаг байсан. Шүүхийн олон шат дамжлагаас гадна шийдвэр гүйцэтгэх дээр хэдэн жилээр гацдаг. Энэ гацаа арилж, ямар нэгэн ахиц гарсан уу. Үүнийг илүү эрчимтэй болгоход ямар эрх зүйн өөрчлөлт хэрэгтэй вэ. Яагаад гэвэл цөөхөн хэдэн муу зээлдэгчээс болж сайн зээлдэгчид нь хохироод явдаг. Сайн зээлдэгчдийн зээлийн төлбөр дээр муу зээлийн эрсдэлийн сангийн зардал буудаг болохоор.
Монголбанкны ерөнхийлөгч Б.Лхагвасүрэн: Зээлийн дундаж хүү 14.5, хөтөлбөрийн зээл буюу ипотекийн, Эдийн засгаа сэргээж эрүүл мэндээ дэмжих Засгийн газрын хөтөлбөрийн зээлүүдийг оруулах юм бол 13.8-тай байгаа.
Өнөөдрийн байдлаар Монголбанкнаас банкуудтай хийсэн свопын нийт дүн 1.6 тэрбум ам.доллар байна. 2021 онд 160 сая ам.долларын своп шинээр хийгдсэн.
Маргааныг түргэн шуурхай, шүүхийн бус аргаар шийдвэрлэдэг болох талаас нь ХЗДХЯ-тай хамтран ажлын хэсэг байгуулаад ажиллаж байна. Иргэний хууль, Иргэний хэрэг шүүхэд хянан шийдвэрлэх, Шүүхийн шийдвэр гүйцэтгэх тухай хуулиудад өөрчлөлт оруулахаар саналдаа өгсөн байгаа.
Монголбанкны дэд ерөнхийлөгч Г.Дөлгөөн: Бизнесийн зээлийн хувьд банк талдаа иргэдийн зээлээс илүү өгөөжтэй. Гэхдээ нөгөө талд зардал өндөртэй харагддаг.
Эргэлтийн зээл дунджаар 15 хувьтай буюу тухайн банкныхаа чадамжаас хамаараад сарын 1.3-1.4 хувийн хүүтэй байгаа.
УИХ-ын гишүүн Г.Амартүвшин: 10 их наядын хөтөлбөрийн хүрээнд арилжааны банкууд нийт гаргасан эх үүсвэрийн хэдэн хувийг дахин санхүүжүүлэхэд зарцуулсан бэ. Зээлийн хүртээмж муу байна гэдэг хардлага байна.
Монголбанкны ерөнхийлөгч Б.Лхагвасүрэн: 4,317 зээлдэгчийн зээлд бүтцийн өөрчлөлт хийсэн. Дахин санхүүжилтэд 271 тэрбум төгрөг зарцуулсан.
