"Сурагч охин болон нутгийн иргэн буудуулж нас барсан хэргийг шалгаж байна"
Өвөрхангай аймгийн Зүүнбаян-Улаан суманд тус сумын ерөнхий боловсролын сургуулийн ахлах ангийн сурагч охин болон нутгийн иргэний цогцос олдсон байна.
Урьдчилсан байдлаар хоёр иргэнийг буудуулж нас барсан гэж үзэж байгаа аж.
Зарим хэвлэл мэдээллийн хэрэгслээр уг хэргийн талаар тус сумын харьяат залуу сурагч охиныг удаа дараа дарамталж байсны эцэст буудаж хөнөөгөөд, дараа нь өөрийгөө хороосон хэмээн мэдээлж буй.
Хэргийн талаар цагдаагийн байгууллагаас тодруулахад “Тус суманд хоёр хүний амь нас хохирсон харамсалтай хэрэг гарсан. Талийгаачдын нэг нь сургуулийн сурагч охин бол нөгөө нь нутгийн иргэн залуу байсан. Тэдний цогцсыг сумын сургуулийн ойролцоогоос олсон. Хэргийг шалгах ажил үргэлжилж байгаа тул үүнээс дэлгэрэнгүй мэдээлэл өгөх боломжгүй” гэсэн юм.
Тэгвэл БШУ-ны сайд Л.Энх-Амгалан уг хэрэгт харамсаж буйгаа илэрхийлэн “Боловсролын сайдын болон эцэг хүний хувьд Өвөрхангайд болсон аймшигтай, зэрлэг, балмад гэмт хэрэг үйлдэгдсэнд гүн эмгэнэл илэрхийлье. Хүүхэд бүр эрүүл аюулгүй орчинд сурч боловсрох эрхтэй. Энэ эрхийг баталгаажуулах нь Монгол төрийн үүрэг. Гэм буруутай бүх хүн хариуцлага хүлээх ёстой!” хэмээн жиргэсэн байна.
