Нийслэл хотод газар чөлөөлөлт явагдах байршлууд

Гэрэл зургийг MPA.mn

Нийслэлийн удирдах ажилтнуудын шуурхай зөвлөгөөн өнөөдөр болж, энэ онд хэрэгжүүлэх хөрөнгө оруулалт, бүтээн байгуулалтын ажлын газар чөлөөлөлтийн бэлтгэл ажлын талаар танилцуулав. Энэ онд газар чөлөөлөх 408 төсөл, арга хэмжээг баталж, нийт 4,729 га талбай буюу 20,218 нэгж талбарт газар чөлөөлөх юм байна.

Тодруулбал

• Сонгинохайрхан дүүргийн 8 дугаар хороо Баянхошуу дэд төвд 165 га талбайд 2,164 нэгж талбарт 
• Сүхбаатар дүүргийн 17 дугаар хороо Дамбадаржаа дэд төвд 59 га талбайд 810 нэгж талбарт
• Баянзүрх дүүргийн 10, 17, 19, 24, 34 дүгээр хороо Шархад дэд төвд 536 га талбайд 5,910 нэгж талбарт
• Чингэлтэй дүүргийн 14 дүгээр хороонд Сэлбэ дэд төв гэр хорооллыг дахин барилгажуулах төслийн хүрээнд 358 нэгж талбарт
• Сүхбаатар дүүргийн 9 дүгээр хороо Баянбүрд орчмын хэсэгчилсэн ерөнхий төлөвлөгөөний хүрээнд ногоон байгууламж, авто зогсоол зэргийг барихад 7.1 га талбайд 110 нэгж талбарыг тус тус чөлөөлнө.

Авто замын болон ДЦС-ын ажлын хүрээнд газар чөлөөлөх байршлууд:

• Баянзүрх дүүргийн 12, 37 дугаар хороо, Нарны замын зүүн өргөтгөл 4 км авто зам
• Туулын хурдны зам, Нэгдүгээр тойрог зам, Хан-Уул дүүргийн 8 дугаар хороо Яармагийн шинэ зам Хөшигийн хөндийн хурдны замтай холбох авто зам
• Баянгол, Сонгинохайрхан дүүрэгт Геологийн төв лаборатори орчим, авто зам, нүхэн гарц
• Баянгол дүүргийн 20 дугаар хороонд ТЭЦ-5 дулааны цахилгаан станцын газар чөлөөлөлтийг хэрэгжүүлнэ.

Нийгмийн дэд бүтцийн барилга, байгууламж:

• Хан-Уул дүүргийн 12 дугаар хороонд Хог шатааж, эрчим хүч гаргах үйлдвэр барих
• Хан-Уул дүүргийн 6 дугаар хороонд Гал унтраах анги барих
• Баянгол дүүргийн 16 дугаар хороонд Гандангийн жишиг гудамж тохижилт бүтээн байгуулалтын ажилд газар чөлөөлөхөөр төлөвлөжээ.

Харин Сэлбэ хот төсөлд 158 га талбайд нөлөөлөлд өртсөн нийт 2,206 нэгж талбараас 2,091 нэгж талбарыг 2024-2025 онд нөхөх олговортойгоор чөлөөлжээ.

Сонгинохайрхан дүүргийн 5 дугаар хороо Ханын материал орчмыг орон сууцжуулах ажлын хүрээнд 213 нэгж талбарт газар чөлөөлөхөөс 210 нэгж талбарыг чөлөөлсөн. Нийт 12.6 га талбайд газар чөлөөлөлт үргэлжилж байна.

Мөн Сонгинохайрхан дүүргийн 4 дүгээр хороо Гэр хорооллын газрыг дахин төлөвлөх ажлын хүрээнд 202 нэгж талбарыг чөлөөлөхөөс 165 нэгж талбарыг чөлөөлсөн бол нийт 10.3 га талбайд газар чөлөөлөлт хийгдэж байгаа аж.

Энэ онд газар чөлөөлөлтийн нөхөн олговорт 200 тэрбум төгрөгийг зарцуулахаар батлаад байгаа билээ.