Сүхбаатар дүүргийн зарим хорооны угсармал орон сууцад гадна фасад, дулаалга хийж байна
Угсармал орон сууцны барилгуудыг үе шаттайгаар дулаалж байна.
Тухайлбал, Сүхбаатар дүүргийн 7, 8, 10 дугаар хорооны байруудад гадна фасад, дулаалга хийж байгаа тухай нийслэлийн Хөрөнгө оруулалтын газраас мэдээлэв. Тодруулбал, угсармал орон сууцны барилгын дулаан техникийн шинэчлэлийг хийх ажлын хүрээнд дээрх хороодын зайлшгүй засвар хийх шаардлагатай 3, 5а, 9/1, 13, 21, 34, 50 дугаар байрт гадна фасад, дулаалгын ажлыг гүйцэтгэж байгаа аж.
Угсармал орон сууцны барилгын дулаан алдагдлыг бууруулснаар оршин суугчдын эрчим хүч, дулааны хэрэглээ буурч, хэрэгтэй газарт тэрхүү илүүдэл цахилгаан, дулаанаа зарцуулах боломж бүрдэх юм.
Барилгын гадна талын ханыг сүүлийн үеийн технологи болох дулаан тусгаарлалтын хөөсөнцөр тавьж, иж бүрэн шавардлага хийж дулаалж буй. Гүйцэтгэгчээр “Моксан” ХХК, “Үүлэн сүндэр” ХХК ажиллаж байна.
Эх сурвалж: Нийслэлийн Хөрөнгө оруулалтын газар
