Ш.Гомбодорж: МУИС хичээлийн хоёрдугаар байрныхаа арын ногоон байгууламж дээр барилга битгий бариачээ гэж хүсэж байна

зургийг иргэн Ш.Гомбодоржоос авав

МУИС-ийн хичээлийн хоёрдугаар байрны хойд талын ногоон байгууламжийн оронд таван давхар байшин баригдах гэж буйтай холбоотой асуудлаар бид өчигдөр тус сургуулийн Хангамж үйлчилгээний газрын дарга В.Алтансүхтэй холбогдож тодруулга авахад "МУИС-ийн ногоон байгууламж эвдэгдээгүй. Хуучин гарааш, хүлэмж байсан газарт Багш, оюутны хөгжлийн төв баригдана" хэмээн хэлсэн билээ. 

Тодруулгыг бүрэн унших бол ЭНД дарна уу. 

Гэхдээ уг асуудал нь тухайн нутаг дэвсгэрийн ойролцоо оршин суудаг иргэдийн эрх ашигтай холбоотой асуудал тул барилга барихгүй байх хүсэлт гаргаж буй иргэд байгаа аж. Тэдний төлөөлөл болох СБД-ийн 6 дугаар хорооны иргэн Ш.Гомбодорж редакцид өнөөдөр хандсан юм. 

Тэрбээр хэлэхдээ "МУИС хичээлийн хоёрдугаар байрныхаа арын хэсэг дэх ногоон байгууламж дээрээ таван давхар барилга барьж байгаа. Миний хувьд МУИС-ийн бүх холбогдох хүмүүстэй очиж уулзаад, учрыг тодруулахад НИХТ-ын 2014 оны 5/14 дэх тогтоолд заасан журмын дагуу энэ хэсгийг орон сууцны барилгажаагүй талбай гэж үзэхгүй учраас яг хойд талд нь 10-20 метрийн зайтай амьдарч байгаа манай байрны иргэдээс санал авахгүйгээр шийдэж, бүх ажил нь ном журмынхаа дагуу явагдаж байгаа юм билээ. Иймээс үндсэндээ дараах хоёр асуудлыг тавьж байна. Үүнд,

1. Энэ хүмүүсийн хэлснээр ногоон байгууламжийг сүйтгээгүй гэсэн нь худал. Урд талынхаа моднуудыг хөгшин мод гээд ойлгуулж байгаа. Интенетээр хайгаад үзэхээр энэ моднууд нь 300 насалдаг гэж гарч ирж байгаа ба улиас мод 50-100 жилийн настай.
2. МУИС хотын төв дэх цөөхөн үлдсэн ногоон байгууламжийн хэсгээс хумслаад байшин барих нь хэр зөв бэ. Энэ хавьд ажилж, амьдардаг хүмүүсийн эрх ашгийн үүднээс Ногоон байгууламжаа хамгаалж үлдэх тухай хүсэлтийг НИТХ төлөөлөгчид, УИХ гишүүдэд хүргүүлсэн.

Баригдах гэж буй барилга тус барилга нь эрх зүйн хувьд зөрчилгүй учраас бидний зүгээс барилгын зөвшөөрлийг цуцлуулахаар захиргааны хэргийн шүүхэд хандах боломжгүй. Иймд тойргоос гарсан УИХ-ын гурван гишүүн, НИТХ-ын хоёр төлөөлөгч, Боловсролын сайд, хотын дарга нарт цөөхөн үлдсэн ногоон байгууламжаа хадгалаад үлдээсэй гэж хүсэж байгаа юм" гэв.