50 ба түүнээс дээш насны иргэд коронавирусийн халдварын эсрэг вакцинд өнөөдөр, маргааш идэвхтэй хамрагдахыг уриаллаа
ХӨСҮТ-ийн Дархлаажуулалтын албаны дарга О.Дашпагма коронавирусийн эсрэг дархлаажуулалтын талаарх мэдээллийг өглөө.
Тэрбээр "Дөрөвдүгээр сарын 3-ны өдөр 46 цэгт 128 багийн 923 эмч, эмнэлгийн мэргэжилтнүүд ажиллан нийслэл хот болон Дархан-Уул, Дорноговь, Говь-Алтай, Өмнөговь, Орхон, Төв аймагт дархлаажуулалтыг зохион байгууллаа.
Өчигдөр 10,000 гаруй хүн хамрагдсанаар улсын хэмжээнд вакцин хийлгэвэл зохих хүн амынхаа 17.8% буюу 346,745 иргэнийг хамруулаад байна. Вакцин хийлгэсэн хүмүүст ноцтой хариу урвал илрээгүй. Вероселл вакцин хийлгэсэн хүмүүсийн 14%-д ерөнхий түгээмэл хариу урвал илэрч байна. Харин Prifer вакцин хийлгэсэн хүмүүсийн 5%-д бие эвгүйрэх, халуурах зэрэг ерөнхий түгээмэл хариу урвал илэрч байгаа юм.
Насны бүлгээр авч үзвэл 50-аас дээш насны 245 мянган иргэн байгаагийн 124 мянга нь буюу 50% нь вакцинаа хийлгэжээ. Өнөөдөр болон маргааш 50-аас дээш насны иргэдийг вакциндаа идэвхтэй хамрагдахыг уриалж байна. Түүнээс цааш бусад насны бүлгийн иргэдийг вакцинд хамруулах ажлыг эрчимжүүлэхээр төлөвлөж байгаа" гэлээ.
Мөн ЭМЯ-ны Хэвлэлийн төлөөлөгч Б.Ууганбаяр "50-аас дээш насныхан гэдэгт 65 ба түүнээс дээш насныхан ч хамаарах тул вакциндаа идэвхтэй хамрагдаж, эрсдэлээс өөрийгөө болон ойр дотны хүмүүсээ хамгаална уу" гэсэн юм.
ВИДЕО:
