75 дугаар сургуулийн шинэ барилга хөгжлийн бэрхшээлтэй хүүхэд сурах нөхцөлийг 100% бүрдүүлсэн байна

Эх сурвалж: БШУЯ

Япон Улсын Засгийн газрын буцалтгүй тусламжаар “Улаанбаатар хотын бага дунд боловсролын сургуулийн барилга байгууламжийг сайжруулах” төслийн хүрээнд нийслэлд хоёр сургууль, хоёр сургуулийн өргөтгөлийн барилгыг барих ажил 2017 онд эхэлсэн. 

Боловсрол, шинжлэх ухааны яамны захиалгаар баригдсан эдгээр барилгын гурав нь 2020 оны намар ашиглалтад орсон юм.

Одоо дөрөв дэх сургууль болох Хан-Уул дүүргийн 75 дугаар сургуулийн барилгыг Улсын комисс халдвар хамгааллын журмыг баримтлан ажиллаж, хүлээн авлаа. Ийнхүү 75 дугаар сургууль нэг ээлжиндээ 960 хүүхэд хүлээн авах, хамгийн сүүлийн үеийн тоног төхөөрөмжөөр тоноглогдсон, хөгжлийн бэрхшээлтэй хүүхэд сурах нөхцөлийг 100 хувь бүрдүүлсэн сургууль боллоо.

Япон Улсын Засгийн газрын буцалтгүй тусламжаар баригдсан сургуулиуд:

1. Чингэлтэй дүүргийн 7 дугаар хороонд 720 хүүхдийн хүчин чадалтай сургууль,
2. Налайх дүүргийн 109 дүгээр сургуулийн 320 хүүхдийн хүчин чадалтай өргөтгөл,
3. Баянзүрх дүүргийн 53 дугаар сургуулийн 480 хүүхдийн хүчин чадалтай өргөтгөлийн барилга 
4. Хан-Уул дүүргийн 75 дугаар сургуулийг буулгаж, 920 хүүхдийн хүчин чадалтай сургууль.