Казахстаны ерөнхийлөгч латин үсгийн шинэ цагаан толгой боловсруулах даалгаврыг сайд нартаа өгчээ

Казахстаны ерөнхийлөгч Касым-Жомарт Токаев латин үсэг дээр суурилсан казах хэлний шинэ цагаан толгой боловсруулах даалгаврыг засгийн газрынхаа сайд нарт өгсөн байна.

Тодруулбал соёлын сайд Актоты Раймкулова, боловсролын сайд Асхат Аймагхамбетов нарт ийм даалгавар өгсөн тухай тус улсын ерөнхийлөгчийн хэвлэлийн алба мэдээлжээ.

2017 оны дөрөвдүгээр сард тухайн үеийн ерөнхийлөгч Нурсултан Назарбаев 2025 он гэхэд Казахстаны бүх ном хэвлэл, бичиг баримт, хаяг тэмдэглэгээ кирилл үсгээс латин руу шилжсэн байх төлөвлөгөөг зарлаж байв.

Тэр 2017 оны аравдугаар сард энэ төлөвлөгөөгөө зарлиг болгож баталгаажуулсан юм.

Одоогоор латин үсэгт суурилсан хоёр хувилбар цагаан толгойг мэргэжилтнүүд танилцуулсан ч тэднээс алийг нь ч сонгоогүй байгаа. Токаев гурав дахь шинэ хувилбарыг боловсруулах даалгавар өгөөд байна.

1929 онд Зөвлөлт Холбоот Улсын удирдагчид тус улсын муслим хүн амын хэрэглэж байсан уламжлалт араб цагаан толгойг латин цагаан толгойгоор сольж байв. 1940 онд дахин шинэчлэхдээ латин бичгийн системийг нь кириллээр сольжээ.

Эх сурвалж: Radio Free Europe