Эр бэлгийн эс хэрхэн сэлдгийг 350 жилийн дараа эрдэмтэд илрүүлжээ

Хүний эр бэлгийн эс шингэн дундуур сэлсээр өндгөн эстэй нийлж, үр тогтдог. Энэ аялал нь маш хүнд хэцүү бөгөөд зүйрлэвэл өндгөн эсэнд хүрч үр тогтоох нь Эверестийн оргилд гарахтай ижил ажээ.

Ойролцоогоор 50 гаруй сая эр бэлгийн эс өндгөн эс олж чадалгүй бүтэлгүйтдэг бол азтай цорын ганц нь амжилттай үр тогтоож, хүн төрдөг байна.

1677 онд эрдэмтэд анх эр бэлгийн эсийг нээсэн ч хүн хэрхэн бүрэлддэг тал дээр 200 жил маргасан гэдэг.

Эрдэмтэд сүүлийн 350 жилийн турш эр эсийг сүүлээ хоёр тал руугаа ээлжлэн шидэх аргаар сэлдэг гэж итгэж байжээ.

Гэтэл саяхан орчин үеийн 3D микроскоп ашигласан эрдэмтэд эр бэлгийн эсний сэлэх арга өөр болохыг анх удаа илрүүлсэн байна.

Ийм олон жилийн дараа үүнийг нээсэн нь өмнө нь зөвхөн 2D микроскоп ашиглаж байснаас гадна эр эсүүд маш өндөр хурдтай сэлдэг, түүнийг нь ажиглах боломж эрдэмтдэд байгаагүйтэй холбоотой. Тухайлбал эр эсүүд секунд хүрэхгүй хугацаанд 20 гаруй удаа сэлүүрддэг ажээ. Супер өндөр хурдтай камераар 55,000 гаруй зураг буулгаж, гурван хэмжээст орчинд хөдөлгөөнийг нь задлан шинжилсний дараа дээрх нээлтийг хийсэн байна.

Үнэндээ эр бэлгийн эс нь сүүлээ зөвхөн нэг тал руугаа шидэж сэлдэг ажээ. Гэхдээ энэ тохиолдолд эсүүд урагшлахгүй, нэг газраа эргэлдэх ёстой. Гэтэл эсүүд биеэ өрөмдөх хэлбэрээр эргэлдүүлж, урагш давших шилжилт хийдэг ажээ.

Өөрөөр хэлбэл нэг талт хөдөлгөөнөө ийм аргаар тэнцвэржүүлдэг юм байна. Эр бэлгийн эсийг ийм өндөр түвшинд судалснаар эрүүл бус эсүүдийг илрүүлж, үргүйдлийн нууцыг тайлах боломжтой гэж эрдэмтэд дүгнэжээ.

350 жил эрдэмтдийг төөрөгдүүлсэн өмнөх ойлголт:

Шинэ ойлголт:

Эх сурвалж: Business Insider