Хэл ам дагуулаад байсан 38-р сургуулийн барилгын асуудал цэгцэрчээ

Баянгол дүүргийн Засаг даргын захирамжаар тус дүүргийн 38-р сургуульд 8352 ам метр газрыг 15 жилийн хугацаатай эзэмшүүлэх гэрчилгээ олгосон

38-р сургуулийн байрыг шинээр өргөтгөн, улсын төсвийн хөрөнгө оруулалтаар 960 хүүхдийн суудалтай сургуулийн шинэ байр, хүүхдийн хөл бөмбөгийн талбай барихаар төлөвлөсөн.

 Гэвч тус газрын 1970 ам метр талбайд БГД-ийн Нутгийн удирдлагын ордон бариулахаар БГД-ын тамгын газрын эзэмшилд шилжүүлсэн үндэслэлийг тодруулахаар тус сургуулийн багш нар хотын даргатай уулзжээ.

Э.Бат-Үүл “Баянгол дүүргийн иргэдэд төрийн үйлчилгээг төвлөрсөн байранд чирэгдэл багатай, хөнгөн шуурхай үзүүлэх боломж нөхцлийг бүрдүүлэх үүднээс төрийн байгууллагын хэрэгцээнд Нутгийн удирдлагын ордны барилга барих газрын асуудлыг шийдвэрлэх шаардлагатай болсон. 38-р сургуулийн барилгыг ашиглах боломжгүй гэж акталсан учир сургуулийн байрыг шинээр барих юм. Тиймээс энэ асуудлыг давхар шийдвэрлэх үүднээс дүүргийн Нутгийн захиргааны ордонтой зэрэгцүүлж, 38-р сургуулийн байрыг шинээр өргөтгөн, сурагчдын багтаамжийг нэмж, улсын төсвийн хөрөнгө оруулалтаар 960 хүүхдийн суудалтай сургуулийн шинэ байр, хүүхдийн хөл бөмбөгийн талбай барихаар төлөвлөсөн” гэж тайлбарлалаа.

Мөн хүүхдийн аюулгүй байдал, барилгын норм дүрэм зөрчөөгүй тохиолдолд Баянгол дүүргийн нутгийн удирдлагын ордны барилгыг барина гэдгийг хотын дарга онцлон хэлсэн юм.

Энэхүү төлөвлөлтийг батлахдаа эхлээд сургууль, хөл бөмбөгийн талбай, нутгийн удирдлагын ордон гэсэн дараалалтайгаар хуваарийг хийхээр сургуулийн захирал болон багш нарын төлөөлөлтэй харилцан тохиролцлоо.