Б.Баярдаваа: Төсвийн орлого батлагдсан дүнгээсээ 1.8-2 их наядаар буурна

Б.Жаргалмаа, IKON.MN

2020 оны 6 сарын 26

iKon.MN

Гэрэл зургийг MPA.mn

Төв банкны Мөнгөний бодлогын хорооноос мэдээлэл хийсний дараа Монголбанкны ерөнхийлөгч Б.Лхагвасүрэн болон Мөнгөний бодлогын газрын захирал Б.Баярдаваа нар сэтгүүлчдийн асуултад хариулсан юм. Тэдний хариултаас онцлох эшлэлүүдийг хүргэж байна.

Оны сүүл рүү цар тахлын хоёр дахь давалгаа эхэлнэ гэсэн таамагтай байсан ч Хятадад халдвар эрчимжиж, АНУ-ын олон хот, мужид хорио цээрийн дэглэм шинээр тогтоож эхэллээ. Энэхүү гадаад нөхцөл байдалтай холбоотойгоор бид Монгол Улсын эдийн засгийн өсөлтийн төлөвийг бууруулсан. Өнөөдрийн шийдвэрийг гаргахдаа хэд хэдэн төлөвөөр тооцоолсон. Өөрөөр хэлбэл, 2020 оны эдийн засгийн өсөлт -0.9% ба хамгийн муугаар бодоход -1.8% байна гэсэн төсөөлөл гарсан.
Монгол Улс одоогоор 8-9 сарын импортын хэрэгцээг хангахуйц хэмжээний гадаад валютын нөөцтэй байгаа.
Гадаад худалдаа эхний гурван сард алдагдалтай байсан ч тавдугаар сард багахан хэмжээний ашигтай гарсан эерэг нөлөө байна. Гэсэн хэдий ч төлбөрийн тэнцэл оны төгсгөл хүртэл 1 тэрбум гаруй ам.долларын алдагдалтай байх төсөөлөлтэй байна.
Ам.долларын эсрэг төгрөгийн ханш тогтвортой байна гэж харж байгаа. Учир нь валютын нөөц хангалттай хэмжээнд байгаа бөгөөд он дуустал өндөр хэмжээний өрийн дарамт байхгүй. 2020 он гарснаас хойш төгрөг 3%-аар суларсан байна.
Зургаадугаар сарын 4-нд ОУВС-ийн захирлуудын зөвлөлийн шийдвэрээр Монгол Улсад Өргөтгөсөн санхүүжилтийн хөтөлбөрийн дараах шилжилтийн буюу Түргэвчилсэн санхүүжилтийн хөтөлбөрийг эхлүүлсэн. Энэ хүрээнд олон улсын байгууллагуудтай тодорхой нөхцөл, тоонуудаа тохироод явж байгаа. Сангийн сайдын мэдээллийг сонссон байх, 2020 он дуустал олон улсын санхүүгийн байгууллагуудаас 700 гаруй сая ам.долларын тусламжийн санхүүжилт орж ирэхээр байна.
Дэлхийн зах зээл дээрх газрын тосны ханш буурсан. Үнийн савалгаа Монгол Улсад хоцрогдолтой орж ирдэг гэдгээрээ цаашид илүү буурах магадлалтай.
Сонгуулийн дараа ам.долларын эсрэг төгрөгийн ханш суларна гэдэг хүлээлт байсан учраас харилцах хадгаламж их хэмжээгээр долларжсан. Зээлтэй хэсгийн 11 хувь нь долларжсан. Тиймээс долларжилтыг бууруулах үүднээс банканд олгох төгрөгийн заавал байлгах нөөцийн урамшууллыг бууруулан тооцохоор болсон.
Төсвийн орлого батлагдсан дүнгээсээ 1.8-2 их наядаар буурна. Хэдийгээр сүүлийн саруудад хөрөнгө оруулалтын зардал танагдаж байгаа ч оны сүүлийн саруудад тэрийг албажуулж, төсөвт тодотгол хийх ажлууд явагдах байх.
Сүүлийн 2-3 жилд Засгийн газар санхүүгийн эх үүсвэрийн нөөцөө нэлээд сайжруулсан. Төв банкан дээрх харилцах дансандаа 1 их наяд гаруй төгрөгийг хуримтлуулсан байснаа хэрэглэж байгаа Мөн гадаад зах зээлээс, арилжааны бус шинжтэй, хандивлагч доноруудаас харьцангуй бага хүүтэй, урт хугацаатай гадаад эх үүсвэр татаж, эдийн засагт оруулж байгаа. Оны эцэс рүү зардал дээр ямар үйлдэл хийхээс хамаараад баланс ямар байх нь тодорхойлогдоно. Үүнтэй уялдаад дотоод зах зээлд бонд гаргах эсэх нь тодорхой болно.

Видео:

Анхааруулга

Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!