Франц-Монголын харилцааны 55 жилийн ойн өдрөөр "Анх-Отгон" эрүүл болсныг зарлав

Эрүүл мэндийн яамны өнөөдрийн мэдээллийн үеэр ХӨСҮТ-ийн захирал Д.Нямхүү "Сайхан мэдээ дуулгахад Франц иргэний бүх шинжилгээ эрүүл гарч өнөөдөр дараагийн шатны хяналтад шилжих гэж байна. Тэрбээр 47 хоног эмчлүүлсэн, Энхсаран сувилалд тусгаарлагдана" гэв.

Монгол Улсын хувьд шинэ коронавирусийн халдварын анхны тохиолдол болсон францын иргэнд анхны бас сүүлийн тохиолдол байгаасай хэмээж "Анх-Отгон" гэх нэр өгөөд буй. Тус иргэнд хийж байсан таван төрлийн дээж бүхий шинжилгээний нэгээс нь коронавирус илэрсээр байсныг Д.Нямхүү эмч өчигдөр мэдээлж байсан бол өнөөдөр ийнхүү бүх хариу нь сөрөг гарсныг мэдэгдэж байна. 

Тэгвэл энэ сайн мэдээг дуулгасан өдөр буюу дөрөвдүгээр сарын 27-н нь Монгол-Францын дипломат харилцаа тогтоосон ойн өдөр аж. Өнөөдөр хоёр улсын хооронд дипломат харилцаа тогтоосны 55 жилийн ой тохиож байна.

Монгол Улсын хувьд өнөөдрийн байдлаар шинэ коронавирусийн халдварын 38 тохиолдол бүртгэгдэж 10 нь эдгээд буй.