mpa.mn

Улсын онцгой комиссын Шуурхай штабаас мэдээлэл хийх үеэр гадаад улсаас монгол иргэдээд татах тусгай нислэгийн талаар албаныхан мэдээлж байна. Гадаад харилцааны яамны Консулын газрын дарга Л.Мөнхтүшиг "Гуравдугаар сарын 30-ны өглөөний байдлаар дэлхийн 45 бүс нутгаас 5,600 иргэн эх орондоо ирэх хүсэлтээ гаргаад байна.

УОК-оос шийдвэрлэсний дагуу дөрөвдүгээр сарын 2-ны өдөр Сөүлээс, 4 дүгээр сарын 3-ны өдөр Токио хотоос Монгол Улсын иргэдийг татан авах ажиллагаа бэлтгэл ажлаа хангаад явж байна.

Олон нийтийн зүгээс буруу ташаа мэдээлэл гаргах, гүтгэх байдал гараад буй тул Гадаад харилцааны яамнаас албан ёсны тайлбар мэдээлэл өгье.

Нэгт. Өмнө нь УОК-оос гаргасан шийдвэрийн дагуу Сөүл, Токио, Истанбул, Москва, Берлин чиглэлээс ирэх хүсэлтэй Монгол Улсын иргэдийг тодорхой шалгуур тавьж, Элчин сайдын газар болон Консулын газраас бүртгэл хийсэн. Энэ бүртгэл нь нэг онгоцоор хязгаарлагдаагүй. Тухайлбал, эхний удаа тусгай нислэгээр иргэдийг авч ирэхээр бүртгэл явуулахад Сөүл дэх Элчин сайдын яаманд хоёр хоногийн турш 500 гаруй хүн өөрийн биеэр оочирлож байгаад бүртгэлээ хийлгэсэн.

Тэгэхээр энэ удаагийн нислэг нь шинээр иргэдийг бүртгэж аваад авч ирэх гэж буй явдал биш. Өмнө нь буюу арав гаруй хоногийн өмнө бүртгүүлчихсэн байсан хүндэтгэн үзэх шалтгаантай иргэдийг очиж авах гэж байгаа хоёр дахь нислэг гэж ойлгох нь зүйтэй.

Элчин сайдын яам шинээр бүртгэхгүй байна, хүсэлт авахгүй утсаа авахгүй байна гэх маш их шүүмжлэл гарч байна. Өмнө нь бүртгүүлсэн хүмүүсийн нэрийг МИАТ компанид өгөөд билет бичээд явж байгаа. Билет бичих явцад ямар нэгэн шалтгаанаар билет авахгүй гэх асуудал гарч байгаа тул дараагийн бүртгэлд байгаа хүнийг шилжүүлэх байдлаар зохицуулж байна.

Үүнд Элчин сайдын яамны ажилчид болон МИАТ компанийн ажилчид ямар нэгэн байдлаар авлига аваагүй гэдгийг хариуцлагатайгаар хэлмээр байна.

Хоёрт. Токио дахь Элчин сайдын яаманд транзитаар дамжаад АНУ, Канад зэрэг орноос ирэх хүсэлтэй олон иргэд байгаа. Бид бүх хүсэлтийг ойлгож, мэдэрч байна. Гэхдээ Токио дахь Элчин сайдын яаманд мөн ялгаагүй арав гаруй хоногийн өмнө эхний тусгай үүргийн онгоцоор 250 иргэдийг татан авахад бүртгэл хийлгэчихсэн байсан хүн 700 гарсан. Иймд бүртгэл зогссон.

Тэгэхээр энэ удаагийн дөрөвдүгээр сарын 3-ны онгоцоор Токиогоос ирэх хүмүүс нь өмнө нь бүртгүүлсэн байсан хүмүүс юм. Бид мөн дарааллынх нь дагуу МИАТ компанид нэрсийг нь өгч байна. Шилжүүлсэн бүртгэлийн дагуу МИАТ компаниас тухайн зорчигчидтой нэг бүрчлэн холбоо тогтоогоод баталгаажуулаад явж байна" гэв.

Гадаадад байгаа хамгийн сүүлийн иргэн ирэх хүртэл манай дипломат алба хариуцлагатайгаар ажиллана

Иргэдийн зүгээс хаана бүртгүүлэх вэ, хэдэн хүн болохоор ирж авах вэ хэмээх асуултуудыг консулын газраас ихээр асууж байгаа билээ. Энэ талаар тэрбээр дараах хариултыг өглөө. 

"УОК-ийн шийдвэрийн дагуу элчин сайдын яам болон консулын газарт иргэдийг олноор цуглуулах нь өөрөө өндөр эрсдэлтэй байгаа тул гадаадад байгаа Монголчуудад элчин сайдын яам, консулын газраас цахимаар үйлчилгээ үзүүлж эхэлсэн.

Сөүл дэх элчин сайдын яамны консулын хэлтэс бүрэн бүрэлдэхүүнээрээ /таван хүн/ утсаар тасралтгүй хариулт, зөвлөгөө өгч ажиллаж байна. Утсаа авахгүй, зөвлөгөө өгөхгүй байна гэсэн асуудал байхгүй гэдгийг хэлье. Нэг хүнтэй ярвж байх хооронд дараагийн хүний дуудлага тасарч байгааг манайхан ингэж ойлгоод байна.

Бусад улсад буй иргэдийг газар газраас нь авах боломж байхгүй гэдгийг ерөнхий сайд хэлсэн. Бид хамгийн боломжтой хувилбаруудыг сонгож ажиллана. Тусгаарлах журамд орсон өөрчлөлтөөр хугацаа нь 21 хоног болж, иргэн бүрийг нэг өрөөнд тусгаарлах болсонтой холбогдуулан байрны асуудал гарч, нөөц бололцоондоо тулгуурлан иргэдийг хүлээж авах асуудал үүссэнийг ойлгохыг хүсэж байна.  

Гадаадад байгаа иргэдийн ар гэр, найз нөхөд хамаатан садан нь тухайн хүмүүсээ тайван байлгаж, нөхцөл байдлыг сайтар тайлбарлаж, элчин сайдын яамны мэдээндээ итгэхийг хүсэж байна.

Мөн АНУ-д байгаа иргэд маань дотроо тодорхой тоонд хүрвэл нислэг үйлдэж авна гэх ташаа мэдээллийг тарааж, иргэдийг үймүүлж буй асуудал бий. Өнөөдрийн байдлаар АНУ-д 1,000 хүн гаруй буцаж ирэх хүсэлтээ гаргачихсан байна. Бид хэрхэн авах боломжтой талаар нарийвчлан судална.

Түүнчлэн транзит нислэгээр Сөүл, Токиогоор ирэх боломжтой эсэхийг хүмүүс асууж байна. Үүнд хариулт өгөхөд БНСУ гэхэд дөрөвдүгээр сарын 1-ний 00 цагаас эхлэн тус улсад зорчих гадаад, дотоодын иргэдийг 14 хоног тусгаарлах шинэ журамд шилжсэн. Өөрөөр хэлбэл, Улаанбаатар нисэх нислэг нь баталгаажаагүй иргэд тус улсад ирвэл 14 хоног тусгаарлагдана гэсэн үг.

Эндээс Солонгос улс руу явах хүсэлтэй иргэдийг ойлгож, МИАТ компаниас нэмэлт нислэг гаргах асуудлыг УОК шийдвэрлэж байгаа. Гадаадад байгаа хамгийн сүүлийн иргэн ирэх хүртэл манай дипломат алба хариуцлагатайгаар ажиллана" хэмээх хариултыг өглөө. 

Ням гарагийн орой БНСУ руу 189 солонгос иргэн, 111 монгол иргэн явсан

Мөн Ням гарагийн орой БНСУ-ын Засгийн газрын шийдвэрээр Монголд байгаа тус улсын иргэдийн татан авах ажиллагаанд манай улс дэмжлэг үзүүлэн ажиллалаа. Уг нислэгээр 189 солонгос иргэн, 111 монгол иргэн зорчсон. Зорчигчдын дунд солонгос иргэнтэй гэр бүл болсон хүмүүс болон Солонгост суралцдаг оюутнууд ч байсан гэсэн мэдээллийг өглөө.