Ирэх оноос эхлэн дэлхий даяар нисэх онгоцонд хэрэг тарьсан этгээдүүдийг шийтгэх боломжтой болно
Агаарын тээврийн олон улсын гэрээнд шинэчлэлт хийгдсэнээр ирэх оноос эхлэн нисэх онгоцонд гэмт хэрэг үйлдсэн этгээдүүдэд хуулийн хариуцлага тооцох боломжтой болжээ.
Одоогийн олон улсын гэрээнд онгоцонд хэрэг тарьсан этгээдэд аль улсын хуулиар шийтгэл оноох нь тодорхойгүй байдгаас тэдгээрийн 60 хувь нь ямар нэг хариуцлага хүлээлгүй өнгөрдөг байна.
Учир нь 1963 онд батлагдаж, дэлхийн 186 орон нэгдсэн Токиогийн конвенцид зааснаар онгоцонд гэмт хэрэг үйлдсэн этгээд тухайн нисэх онгоцыг эзэмшигч улсын хуулиар шийтгүүлэх ёстой байдаг.
Тухайлбал АНУ-аас America Airlines компанийн онгоцоор Францад ирэх замдаа зорчигч хэрэгт холбогдсон бол Францын биш, Америкийн хуулиар шийтгүүлэх ёстой ажээ.
Гэвч нэгэнт өөр улсын нутагт газардсан этгээдэд шийтгэл оноох боломжгүй болдог байна.
Өнгөрсөн долоо хоногт Токиогийн конвенцид нэмэлт өөрчлөлт оруулах тогтоолыг Нигери улс баталснаар нэгдүгээр сарын 1-нээс хүчин төгөлдөр болох шалгуур нь хангагджээ.
Ирэх оноос эхлэн нисэх онгоцонд гэмт хэрэг үйлдсэн зорчигч газардаж байгаа орны шүүхээр шийтгүүлдэг болно.
Онгоцонд гардаг гэмт хэргүүд ихэвчлэн архидан согтуурснаас үүдэлтэй байдагийг олон улсын агаарын тээврийн байгууллага IATA мэдээлсэн байна.
Тус байгууллагын тоо баримтад өгүүлснээр 2017 онд нийт 8,731 хэрэг агаарын аялалд бүртгэгдсэн нь өмнөх оны 9,837-оос буурсан үзүүлэлт гэнэ. Хэдийгээр хэргийн тоо буурсан ч ноцтой байдал нь нэмэгдсэн тул Токиогийн конвенцид нэмэлт өөрчлөлт оруулахад хүргэсэн ажээ. Зорчигчдын төдийгүй, онгоцны багийн бие бүрэлдэхүүний аюулгүй байдлыг хангахад ингэх нь зайлшгүй хэрэгтэй болсон байна.
Тухайлбал нисэх онгоцны жолоодлогыг булаан эзэлж, чиглэлийг өөрчлөх гэсэн хэрэг 2016 онд 20 удаа гарсан бол 2017 онд 50 болж нэмэгджээ.
Онгоцны чиглэлийг өөрчилснөөс авиа компаниудад $10,000-$200,000-ын хохирол гардаг байна.
Мөн онгоцонд гардаг бэлгийн хүчирхийллийн хэргүүдийг шийтгэдэг болох зайлшгүй шаардлагатай болжээ. Тухайлбал 2017 онд Лос Анжелес хотоос Панам хүртэл ниссэн онгоцонд нэг эрэгтэй зорчигч эмэгтэй зорчигчийн биед халдаж, хүчирхийлэхийг завдсан ч газардсан хойноо шийтгэлгүй мултарсан байна.
Авиа компаниуд сүүлийн үед өөрийн ажилтнуудыг халдлагаас хамгаалах өөр өөрийн арга хэмжээг авч эхэлжээ. Тухайлбал 2016 онд Korean Air компанийн Вьетнамаас Өмнөд Солонгос руу ниссэн онгоцонд нэг зорчигч бусад зорчигчид болон ажилтнууд руу гэнэт довтолж байв.
Үүний дараа Korean Air компани аюулгүй байдлаа чангатгаж, ажилтнуудаа цахилгаан бороохой хэрэглэх аргад сургажээ. Одоо тус компанийн нислэгийн чиглэл бүрт ядаж нэг бэлтгэгдсэн эрэгтэй үйлчлэгч ажилладаг болсон байна.
Эх сурвалж: Associated Press
