Ёс зүйн долоон дүрэм нийт хүн төрөлхтөнд ижил үйлчилдгийг судлаачид тогтоожээ
Цаасан дээр бичигдээгүй хууль дүрмүүд хүмүүсийн амьдралд нөлөөлж байдгийг ёс зүй гэж нэрлэдэг.
Тэгвэл хэсэг судлаачид бүх хүн төрөлхтөнд ижил үйлчилдэг нийтлэг ёс зүйн дүрмүүд байдаг эсэх, ер нь ёс зүй юуны тулд оршдогийг тогтоохоор ажиллажээ.
Ингээд Оксфордын их сургуулийн антропологичид үндэс угсаа, соёл иргэншил, шашин шүтлэг хамаарахгүйгээр хүн төрөлхтөнд үйлчилдэг нийтлэг долоон дүрэм байгааг олж тогтоосон байна. Мөн эдгээр дүрмүүд байх болсон үндсэн шалтгааныг нэг зорилгын төлөө нэгдэх, хамтрах хэрэгцээ гэж тодорхойлжээ.
Ингээд тэдний тодорхойлсон долоон ёс зүйн дүрэм нь:
- Гэр бүлээ тэтгэх, халамжлах
- Таньдаг нэгэндээ туслах
- Тусыг тусаар хариулах
- Зоригтой байх
- Удирдагчид захирагдах
- Нөөц баялгаа тэгш хуваалцах
- Бусдын хувийн хэрэгт хүндэтгэлтэй хандах
“Сайн үйлийг дэмжиж, нэг зорилгын төлөө нэгдэх, хамтрах нь эдгээр дүрмүүд бий болох үндсэн шалтгаан болж байна” гэж судалгааг ахалсан доктор Оливер Скотт Карри ярьжээ.
Ёс зүйн нэгдсэн дүрмийг тодорхойлохын тулд түүний баг дэлхийн 60 ялгаатай соёл иргэншил, угсаа гаралтнуудын 600 орчим эх сурвалжаас баримт, мэдээлэл цуглуулж, боловсруулсан байна.
Эх сурвалж: Independent
