"Вакцинаас болж нас барсан гэх есөн сартай хүүхдийн шинжилгээний хариу маргааш гарна"
Дархлаажуулалтын талаар ХӨСҮТ-ийн дархлаажуулалт хариуцсан мэргэжилтэн н.Уранжаргал болон Эрүүл мэндийн яамны Тандалт шуурхай удирдлагын хэлтсийн дарга Д.Нарангэрэл нар өнөөдөр Эрүүл мэндийн яамны албан ёсны цахим хуудсаар мэдээлэл өглөө.
Есөн сартай хүүхэд вакцинаас болж нас барсан гэх мэдээлэл олныг сэрдхийлгээд байгаа юм.
Энэ талаар "Есөн сартай хүүхэд вакцинаас болоод эндлээ гэсэн мэдээлэл цахим хэвлэлээр тараад байна. Тус хүүхэд вакцинаас болж биш, үжил өвчний шокын шалтгаанаас болж нас барсан. Өөрөөр хэлбэл тухайн хүүхэд дархлаажуулалтанд хамрагдахаасаа өмнө үрэвсэлт өвчнөөр өвдөж байсан байх магадлалтай. Ийм учир эмгэг судлалын шинжилгээний хариуг 17-ны өдөр эцсийн байдлаар гарсны дараа бид албан ёсны мэдэгдэл хийх болно" хэмээн ХӨСҮТ-ийн дархлаажуулалт хариуцсан мэргэжилтэн н. Уранжаргал тайлбарлалаа.
Хэрвээ хүүхэд дархлаажуулалтанд хамрагдсаны дараа 38 хэм хүртэл халуурч байвал хэвийн үзэгдэл гэж үздэг. Вакцин нь өөрөө биологийн бүтээгдэхүүн учраас халуурч байна гэдэг нь тухайн хүүхдэд дархлал тогтож байна гэсэн үг.
Харин 38-аас дээш хэм халуурвал мэргэжлийн байгууллагад заавал хандаж оношлуулах шаардлагатай аж. Мөн вакцин хийлгэсэн газар улайх, хөндүүрлэх, хавдах шинж тэмдэг илэрдэг ч энэ нь 2-3 хоногийн дараа өөрөө алга болдог байна.
Эрүүл мэндийн яамны Тандалт шуурхай удирдлагын хэлтсийн дарга Д.Нарангэрэл " Хэрвээ хүүхдээ вакцинд хамруулахгүй байвал хүүхэд 13 нэр төрлийн халдварт өвчнүүдээр өвдөх эрсдэлтэй. Хүүхдээ товлолын вакцинд цаг хугацаанд нь хамруулж байж халдварт өвчнөөс сэргийлнэ.
Вакцины талаар буруу ташаа мэдээлэл авч байгаад хүүхдээ дархлаажуулалтаас хоцруулвал илүү их аюултай. Тухайлбал, та бүхэн гурван жилийн өмнө "Улаан бурхан" дэгдэлтийг санаж байгаа байх. Манай улсад ямар вакцин, хаанаас орж ирдгийг сирийн дугаагаар нь шалгах боломжтой, мөн эрүүл мэндийн байгууллагад ямар ч нууц асуудал байхгүй учир вакцин хадгалалтын үйл явцыг ч харуулж болно" гэв.
Хүүхэд вакцин хийхээс өмнө хаана, ямар үйлдвэрт үйлдвэрлэгдсэн гэдгийг эцэг эхчүүдэд танилцуулах ёстой байдаг. Мөн эцэг эхчүүд тухайн вакциныг дулаанд өртөөд чанараа алдсан эсэхийг илэрхийлдэг вакцин бүрт байдаг индикатор буюу чанарын үзүүлэлтийг харж шалгаж болохоос гадна ямар хэмд хадгалагдаж байсныг бүртгэлээс нь харах боломжтой гэдгийг мэргэжлийн хүмүүс хэлж байна.
Видео:
