Хүүхдийг эхийн сүүгээр дагнан хооллох үзүүлэлт Монголд хоёр дахин буурчээ

Жил бүрийн наймдугаар сарын эхний долоо хоногийг дэлхий даяар “Хүүхдийг эхийн сүүгээр хооллолтыг дэмжих дэлхийн долоо хоног” болгон тэмдэглэдэг уламжлалтай болоод өдгөө 26 жил болж байна. 

Энэ жил “Эхийн сүү-эрүүл амьдралын эхлэл” уриан дор улс орон бүрт зохион байгуулагдаж байгаа бөгөөд тус долоо хоногийг манай улсад Эрүүл Мэндийн Яам, Нийгмийн Эрүүл Мэндийн Үндэсний Төв, НҮБ-ын Хүүхдийн Сантай хамтран зохион байгуулж байна. Долоо хоногийн хүрээнд хүүхдийн сүүн тэжээл импортлогч нарт зориулсан уулзалт өнөөдөр болж өнгөрсөн бөгөөд уулзалтанд салбарын мэргэжилтнүүд, аж ахуйн нэгж, компаниудын төлөөлөл оролцсон юм.

Зураг дээр дарж томруулж үзэх боломжтой,

Ийнхүү эхийн сүүнээс илүүтэй нялхсын сүүн тэжээлийн бүтээгдэхүүний хэрэглээ өндөр болсон үед импортоор орж ирж буй бараа бүтээгдэхүүнд өндөр хяналт тавьж нэвтрүүлэх нэн шаардлага тулгараад байна.

Үүнтэй холбогдуулж манай улсад өнгөрсөн жилийн тавдугаар сард “Нялх, балчир хүүхдийн хүнсний тухай хууль” шинэчлэн батлагдсан байдаг. Энэхүү хууль нь анх 2005 онд “Эхийн сүү орлуулагч бүтээгдэхүүний тухай хууль” гэж байсан ч тус хууль нь хэд хэдэн учир дутагдалтай байсан тул өнгөрсөн жил ийнхүү шинэчлэгдсэн байна.

Шинэчилсэн хуулийн талаар ЭМЯ-ны Болдлого төлөвлөлтийн газрын Нийгмийн эрүүл мэндийн тусламж үйлчилгээний бодлого төлөвлөлт хариуцсан мэргэжилтэн Д.Ганзориг “Тус хууль жилийн өмнө батлагдсан ч хуулийн хэрэгжилт тун хангалтгүй байна. Тодруулбал, хууль нь өөрөө нарийвчилсан бус хэт ерөнхий зүйл, заалттай. Тийм ч учраас ЭМЯ Нийслэлийн Мэргэжлийн Хяналтын Ерөнхий Газартай хамтран эхийн сүүг орлох сүүн тэжээлийн бүтээгдэхүүний импортын хяналтыг сайжруулах тал дээр ажиллаж байна.Үүнд бүтээгдэхүүнүүдийн шошго, заавар, савлагаа, хэмжээ, мэдээлэл гэх зэргийг нарийвчлан тусгасан журам гаргах тал дээр илүү анхаарч байна” гэж мэдээлсэн бөгөөд уулзалтаар хүүхдийн сүүн тэжээл импортлогч нарт тус хууль болон бүтээгдэхүүний ерөнхий стандартыг танилцуулсан юм.

Мөн МХЕГ-ын Эрүүл Мэндийн улсын хяналтын ахлах байцаагч Л.Гэрэлмаа “Импортоор орж ирж буй хүүхдийн сүүн тэжээлийн бүтээгдэхүүнүүдэд хангалттай заавар зөвлөмж, тэмдэглэгээ, найруулга, орцын агууламжийн мэдээлэл хангалттай байдаггүйн улмаас эцэг, эхчүүд хүүхэддээ тохирохгүй бүтээгдэхүүн хэрэглүүлж гомдол гаргах явдал цөөнгүй байдаг” гэж байв.

Эхийн сүүгээр хүүхдээ хооллохыг дэмжих, хамгаалах, тусламж дэмжлэг үзүүлэх нь тогтвортой хөгжлийг цогцлооход амин чухал ач холбогдолтойг эрүүл мэндийн салбарынхан дурдаж байв.