Монголын Хэвлэл Мэдээллийн Зөвлөл (МХМЗ) - ийн Удирдах зөвлөлийн ээлжит хуралдаан өнгөрсөн сарын 20-нд болж Гонгор овогтой Гүнжидмааг тус зөвлөлийн орон тооны анхны Гүйцэтгэх захирлаар томилжээ.
Тус байгууллагын шинэ удирдлагаар томилогдсон Г.Гүнжидмаа нь бизнесийн удирдлагаар мастерын зэрэг хамгаалсан, нийгмийн ухааны докторант бөгөөд социологич, сэтгүүлч мэргэжилтэй залуу боловсон хүчин юм.
Тэрбээр хэвлэл мэдээллийн салбарт 18 жил ажиллахдаа хэвлэлийн эрх чөлөө, мэдээллийн ил тод байдал, нийтлэл нэвтрүүлгийн агуулга болон рейтингийн судалгаа, эрэн сурвалжлах сэтгүүл зүйн сургалтын хөтөлбөр, сэтгүүлчийн ур чадварыг хөгжүүлэх гэх мэт олон чиглэлээр судалгаа шинжилгээ, сургалт, зөвлөх үйлчилгээг амжилттай хэрэгжүүлжээ. Г.Гүнжидмаа нь ажлын гараагаа Хэвлэлийн Хүрээлэнд судлаачаар эхэлж, улмаар Судалгааны албаны дарга, Гүйцэтгэх захирлын орлогч зэрэг албан тушаалыг хашиж, гадаад дотоодын 100 орчим сургалт, судалгааны төсөл хөтөлбөрийг амжилттай хэрэгжүүлсэн, сэтгүүл зүйн багш, олон нийтийн мэдээлэл харилцааны мэргэжилтэн, судалгаа эрдэм шинжилгээний болон иргэний нийгмийн байгууллагын удирдлагын туршлагатай.
МХМЗ нь 2015 оны нэгдүгээр сард байгуулагдаж, өнөөдрийг хүртэл амжилттай үйл ажиллагаагаа явуулж байна. Одоогийн байдлаар МХМЗ нь 100 гаруй иргэний гомдлыг хүлээн авч дүгнэлт гаргаад байна.