Apple $800 тэрбумын үнэлгээнд хүрсэн Америкийн анхны компани боллоо

Өчигдөр буюу Мягмар гарагт Apple компанийн зах зээлийн үнэлгээ $800 тэрбумыг давж, ийм өндөр үнэлгээтэй болсон Америкийн анхны компани боллоо.

Хоёр жил гаруйн өмнө тус компани $700 тэрбумын босгыг давж байсан юм. iPhone үйлдвэрлэгчийн хувьцааны үнэ энэ он гарсаар 33 хувь, АНУ-ын ерөнхийлөгчийн сонгуулиас хойш (өнгөрсөн оны арваннэгдүгээр сар) 50 хувиар өсөөд байна.

S&P 500 индексийг бүрдүүлж байгаа $21.7 их наядын зах зээлийн 4 хувийг Apple дангаар төлөөлж байсан гэсэн үг юм. Хэрвээ Apple-ийн замнал энэ хэвээр үргэлжилбэл 2017 оны сүүлээр $1 их наядын босгыг давж магадгүй байна.

Apple-ийн хувьцааны үнэ өчигдөр арилжаа хаагдахад $153.99 байжээ. Ингэснээр тус компанийн зах зээлийн үнэлгээ $802.8 тэрбум болсон нь АНУ-ын 50 муж улсын 45-ын эдийн засгаас том болж байгаа юм. Apple-аас том эдийн засагтай мужуудад Иллиноис, Флорида, Нью Йорк, Техас, Калифорни багтаж байна.

Эх сурвалж: Reuters