ХУУЧИРСАН МЭДЭЭ: 2016/04/20-НД НИЙТЛЭГДСЭН
Ж.Оджаргал: Монголчууд бид дотроо ойлголцож чадаагүйгээс болж өөрсдөө л хохирч байна
iKon.MN
Монгол Үндэсний Олон Нийтийн Телевизийн "Цаг үе, үзэл бодол" ярилцлагын нэвтрүүлгээр MCS группын Захирлуудын Зөвлөлийн дарга Ж.Оджаргал оролцож ярилцлага өгсөн билээ.
Энэхүү ярилцлагаас Ж.Оджаргалын хэлсэн ОНЦЛОХ ЭШЛЭЛүүдийг та бүхэндээ ЗОХИОГЧИЙН ЭРХИЙН ЗӨВШӨӨРӨЛТЭЙГӨӨР хүргэж байна.
"Таван Толгой" төслийн тендерт оролцож чадаагүй тухайд:
Дэлхий даяараа нүүрснээс яаж холдох вэ гэж бодож байна.
"Энержи Ресурс" 2010 оноос хоосон байсан говийг аж үйлдвэрийн цогцолбор болгосон. Энэ бол "Эрдэнэт"-ийн дараа орох том төсөл гэж боддог.
Улсад бид нар ямар нэгэн эрсдэл үүсгэхгүйгээр олон улсын хөрөнгийн биржээс мөнгө босгож Өмнийн говьт хөрөнгө оруулалтуудыг хийсэн.
2014 онд Засгийн газар ТТ ордод тендер зарласан. Улмаар Японы "Сүмитомо", Хятадын "Шинхуа" бидэнд хамтарч орох санал тавьсан. Тухайн үеийн Засгийн газрын зарласан зарчмын дагуу л бид тендерт оролцсон.
Энгийнээр тайлбарлавал төрийн орон сууцыг хувь хүн түрээслэж сууж байгаатай л адилхан зарчмын нөхцөлтэй гэрээ байсан. Түрээслэгч иргэн дампуурвал орон сууц төрдөө л үлдэнэ. Түүнээс иргэн тэр байрыг аваад явахгүйтэй л адил зүйл юм.
Өөрөөр хэлбэл, орд нь төрдөө л үлдэх гэрээ байсан юм.
Монголчууд бид дотроо ойлголцож чадаагүйгээс болж өөрсдөө л хохирч байна.
ТТ тендерт бид хоёр, гурван сар их л олон яам, төр засгийн агентлагуудтай хамтарч ажиллаж эцэст нь гэрээнд гарын үсэг зурахад бэлэн болсон байсан.
Төмөр замын асуудлаар:
Улсаас нэг ч төгрөг гаргахгүйгээр төмөр зам баръя гээд санхүүжилтээ татаад бариад эхэлчихсэн байсан. Ингэж байтал төр өөрөө хийнэ гээд бид бүх ажлаа хүлээлгээд өгсөн.
Тухайн үед төр өөрөө барина гэж зогсоогоогүй бол бидний барьж байсан төмөр зам өнөөдөр ашиглалтанд орчихсон байх байсан.
Хэрвээ төмөр зам орчихсон бол өнөөгийн нүүрсний экспорт шал өөр түвшинд байх байлаа.
Бид өөрсдөөсөө л болж боломжоо алдаж байна л гэж хэлье.
MMC нээлттэй компани учраас бүх тайлан тооцоог аудитын компани нягталдаг. Тиймээс бид буруу зүйл хийе гэсэн ч тийм боломж байхгүй.
Төмөр замын ажлыг хүлээлгэж өгөхдөө улсаас их хэмжээний мөнгө шамшигдуулсан нь гүтгэлэг.
Бид баяжуулсан нүүрс гаргаад дэлхийн зах зээлтэй өрсөлдөх боломж бий юу. Бий. Ердөө л хоёрхон зүйлийг л шийдэх ёстой. Нэгдүгээрт, дэд бүтэц буюу төмөр зам. Хоёрдугаарт, түүхийгээр зардаг энэ байдлаа болих хэрэгтэй.
ЗЭЭЛ ба ӨРийн асуудал:
Бүх л уул уурхайн компани зээл авч явдаг. Зөвхөн уул уурхай ч биш.
Дээрээс нь уул уурхайн бүтээгдэхүүний үнийн уналттай холбоотойгоор компаниуд авсан зээлээ хугацаандаа төлж чадахгүй болж зээлээ хойшлуулах хэлцлийг бүгд л хийж байгаа.
MMC 2012 онд босгосон 600 сая долларыг өмнийн говийн дэд бүтцэд шингээсэн. Үүнийг бид төлөх ёстой юу. Төлөх ёстой.
Одоо ямар нөхцлөөр яаж зээлээ сунгах вэ гэдэг хэлэлцээр явж байгаа.
Дампуурах гэж байна гэдэг ташаа ойлголт.
Дефолт гэдэг бол тухайн зээлээ товлосон хугацаандаа төлж чадаагүйг л хэлдэг.
Гэхдээ мэдээж нөхцөл байдал амаргүй байна.
Хөгжлийн тухай:
20 жилийн өмнөхтэй харьцуулахад бид үнэхээр амжилт гаргасан улс.
Сайн зүйлээ бас ярьж байх хэрэгтэй. Өмнөх системтэй харьцуулахад ямар их зүйл өөрчлөгдөж, хөгжиж байгаагаа харьцуулж бодвол бид улстөрчдөдөө баярлах ёстой.
Мэдээж шүүмжлэлтэй асуудал зөндөө.
Бизнесмэнүүд улстөрчидтэй байнга уулзаж байх ёстой. Бид өөрсдийн мэдсэн, сонссоноо тэдэнд байнга ярьж, хэлж байх ёстой юм билээ.
Юм хийх тусам их шүүмжлүүлдэг юм байна. Юу ч хийхгүй суувал магадгүй хэн ч шүүмжлэхгүй байх.
Хөрөнгө оруулагчид хоёр л зүйл харж байна. Нэгдүгээрт, ашигт малтмалын үнэ хаашаа явахыг, Хоёрдугаарт, Монгол Улсын хууль эрх зүй, төр засаг нь тогтвортой байдаг уу гэдгийг л хардаг.
Хөрөнгө оруулалт гэдэг бол хамгийн амаргүй зүйл. 20, 30 сая доллар "Интермэд" гээд эмнэлэгт хөрөнгө оруулж байснаас ашгаа бодвол банканд хадгалуулаад зугаалаад явж байсан нь дээр шүү дээ.
Бизнесийн тухай:
MCS бүх зүйлийг хуулийн дагуу хийх зарчимтай. Дээрээс нь Монголчуудын тэр болгон хийж чадахгүй байгаа зүйлийг зоригтой авч хийдэг. Үүний цаана бид асар их боловсон хүчин бэлтгэж байж хийдэг. Энэ болгоныг зарим улстөрч хараад дэмждэг. Тэр улсууд манайхыг дэмжээд ярихаар тэднийг MCS-тэй холбож тайлбарладаг.
Тэгэхээр улстөрчидтэй холбодог асуудалд би огт эмзэглэдэггүй.
MCS яг одоогийн байдлаар 7,600 ажилтантай.
Бид жилд дунджаар дотоодын гурван мянган аж ахуй нэгжтэй харьцдаг.
Бизнесийн хамгийн чухал гурван зүйл нь нэгдүгээрт тухайн хүний сэтгэл ханамж. Хоёрдугаарт, бизнесийн хараа маш чухал. Гуравдугаарт, тухайн бизнесийн улсад төлж буй татвар чухал зүйл юм.
Бид сүүлийн зургаан жил улсын төсөвт 1.3 их наяд төгрөг төлсөн байна. Энэ тоог татварын зарцуулалттай харьцуулаад харахаар нийт тэтгэврийн 318 мянган хүнд тэтгэврийн доод хэмжээ болох 207 мянган төгрөгийг 20 сар олгохтой тэнцдэг юм билээ.
Өөр тоо гэвэл улсын хэмжээнд 27 мянган багш, ажилтан байдаг юм билээ. Тэр 27 мянган багшийн долоон жилийн цалинтай тэнцэх татварыг бид төлсөн байна.
Тэгэхээр MCS долоон мянган ажилтныхаа хажуугаар их олон хүний цалин, тэтгэврийг шийдэхэд иргэн хүний гэх үү, бизнесмэн хүний хувьд хариуцлага хүлээж байгаа юм.
Бид нарын зорилго Монголдоо яаж гоё амьдрах вэ гэдэгт л оршиж байгаа.
АСЕМ-д зориулсан өндөр зэрэглэлийн хотхоныг жил хүрэхгүй хугацаанд барих төслийг хэрэгжүүлж байгаа. Бид өөрсдөө зээлээ аваад эрсдлээ өөрсдөө хариуцаж байгаа.
Бид улстөржилтөө багасгаад өөр өөрсдийнхөө ажлаа сайн хийх юм бол үнэхээр гурван саяулаа боломжийн сайхан амьдралтай болно гэдэгт эргэлзэхгүй байгаа.
Гэхдээ дунд хугацаандаа амаргүй хоёр, гурван жил болох байх.
Эцэст нь:
Төрийн ачаанаас үүрэлцэж байгаа бизнес эрхлэгчдийг сонгууль дөхөж байгаа энэ үед улстөрчдийн хэрүүлд битгий татаж оруулээч ээ гэж хүсмээр байна.
