Хатагтай Сумитра Махажаныг Чингисийн талбайд угтаж авлаа
Монгол Улсын Их Хурлын дарга Зандаахүүгийн Энхболд Монгол Улсад албан ёсны айлчлал хийж буй Бүгд Найрамдах Энэтхэг Улсын парламентын Доод танхим /Лок Сабха/-ын дарга хатагтай Сумитра Махажаныг өнөөдөр Чингисийн талбайд угтан мэндчиллээ.
Улсын Их Хурлын дарга З.Энхболд эрхэм зочны хамт их эзэн Чингис хааны хөшөөнд хүндэтгэл үзүүлсний дараа Төрийн ордны Ёслол хүндэтгэлийн өргөөний Баганат танхимд саатан Бүгд Найрамдах Энэтхэг Улсын парламентын Доод танхим /Лок Сабха/-ын дарга хатагтай Сумитра Махажан хүндэт зочны дэвтэрт сэтгэгдлээ үлдээн, гарын үсэг зурсан юм.
Үүний дараа Бүгд Найрамдах Энэтхэг Улсын парламентын Доод танхим /Лок Сабха/-ын дарга Монгол Улсын Их Хурлын дарга З.Энхболдтой хийх албан ёсны хэлэлцээ эхэллээ.
Энэ өдөр хатагтай Сумитра Махажан Монгол Улсын Ерөнхийлөгч Ц.Элбэгдоржид бараалхана. Мөн Монгол Улсын Ерөнхий сайд Ч.Сайханбилэг эрхэм зочинд бараалхах юм.
Түүнчлэн Парламентын дарга нар Бүгд Найрамдах Энэтхэг Улсын Засгийн газраас Хавдар судлалын үндэсний төвд хандивласан зайн туяа эмчилгээний “Bhabhatron II” аппарат, туяа эмчилгээний төлөвлөлтийн симулятор аппаратыг ашиглалтад хүлээлгэн өгөх нээлтийн ёслолд оролцоно.
Айлчлалын үеэр Монгол Улсын Их Хурлын Тамгын газрын Ерөнхий нарийн бичгийн дарга Б.Болдбаатар, Бүгд Найрамдах Энэтхэг Улсын парламентын Доод танхим /Лок Сабха/-ын Тамгын газрын Ерөнхий нарийн бичгийн дарга Ануул Мишра нар Монгол Улсын Их Хурлын Тамгын газар, Бүгд Найрамдах Энэтхэг Улсын парламентын Доод танхим (Лок Сабха)-ын Тамгын газар хоорондын хамтын ажиллагааны протоколд гарын үсэг зурах юм.
Хатагтай спикер Сумитра Махажан тэргүүтэй төлөөлөгчдийн бүрэлдэхүүнд:
- Энэтхэг Улсын парламентын Дээд танхим /Ражяа Сабха/
- Доод танхим /Лок Сабха/-ын зарим гишүүд
- Парламентын Доод танхим /Лок Сабха/-ын Тамгын газрын Ерөнхий нарийн бичгийн дарга, албаны бусад хүмүүс орсон байна хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.
Гэрэл зургийг mpa.mn
БНЭУ-ын парламентын Доод танхмийн дарга хатагтай Сумитра Махажаны товч намтар
- Сумитра Махажан 1943 оны 04 дүгээр сарын 12-нд Энэтхэг Улсын Махараштрад төрсөн. Хуульч, сэтгэл зүйч мэргэжилтэй.
- 1982-1985 онд Индор хотын Иргэдийн Төлөөлөгчдийн Хурлын гишүүн
- 1984-1985 онд Индор хотын Иргэдийн Төлөөлөгчдийн Хурлын орлогч дарга
- 1989-1991 онд Лок Сабхагийн гишүүн
- 1990-1991 онд Парламентын Зөвлөлдөх хорооны гишүүн
- 1991-1996 онд Лок Сабхагийн гишүүн
- 1992-1994 онд Бхаратья Жаната намын Дэд ерөнхийлөгч
- 1995-1996 онд Мадхая Прадеш мужийн Бхаратья Жаната намын ТУЗ-ийн дарга
- 1996-1999 онд Лок Сабхагийн гишүүн
- 1996 онд Бхаратья Жаната намын Нарийн бичгийн дарга
- 1998-1999 онд Лок Сабхагийн гишүүн
- 1998 онд Бхаратья Жаната намын Ерөнхий нарийн бичгийн дарга
- 1999-2004 онд Лок Сабхагийн гишүүн
- 1999-2002 онд Хүн амын хөгжлийн сайд
- 2002-2003 онд Харилцаа холбоо, мэдээлэл, технологийн сайд
- 2003-2004 онд Газрын тос, байгалийн хийн сайд
- 2004-2009 онд Лок Сабхагийн гишүүн
- 2009-2014 онд Лок Сабхагийн гишүүн
- 2014 оноос Лок Сабхагийн даргаар ажиллаж байна.
