БНХАУ хилээ тав хоног ХААНА

Цагаан сараар албан ёсны амралтын гурван өдөр манай улс хилээ хаана. Мөн БНХАУ ч гэсэн жил бүр Еэвэн сараа тэмдэглэж хилээ хаадаг билээ.

Энэ жил хил хэд хоног хаагдахыг ХХЕГ-ын Хилийн боомтын хамгаалалтын хэлтсийн ахлах мэргэжилтэн дэд хурандаа Д.Энхтайванаас тодрууллаа.

- Энэ жил Хятадын Еэвэн сар, манай Цагаан сар хоёрын тэмдэглэлт өдрүүд зөрж байгаа гэсэн. Тэгэхээр урд хил хэд хоног хаагдахаар байгаа вэ?

- Хоёр улсын хилийн дэглэмийн гэрээ хэлэлцээрийн дагуу хил хаадаг. Энэ жилийн хувьд Хятадын Еэвэн сарын шинийн нэгэн хоёрдугаар сарын 7-ны өдөр таарч байгаа. БНХАУ уламжлалт баярынхаа үеэр тав хоног буюу хоёрдугаар сарын 7-11-ний өдрийг дуустал хилээ хаахаа мэдэгдсэн. 

Харин манай Цагаан сарын шинийн нэгэн хоёрдугаар сарын 9-нд тохиож, хилээ гурав хоног хаана. 

Баярын эхлэх өдрүүд зөрж байгаа ч хил нээх өдөр давхцаж, хоёрдугаар сарын 12-ны өдрөөс эхлэн хилийн боомтууд цагийн хуваарийн дагуу ажиллаж эхэлнэ.

- Хил хаах үеэр төмөр замын боомтууд хэвийн ажилладаг байх аа?

- Тийм ээ. Авто замын боомтууд л шинийн дөрөвний өдрийг хүртэл хаагдах бөгөөд төмөр замын боомт хэвийн ажиллана. Тиймээс сар шинийн баяраар хил гарах ажилтай хүмүүс галт тэргээр зорчиж болох юм. 

- Улсын хэмжээнд хэчнээн боомт үйл ажиллагаа явуулж байгаа вэ?

- Улсны хэмжээнд нийт 26 боомт үйл ажиллагаа явуулдаг. Одоогийн байдлаар Замын-Үүд, Алтанбулагийн боомтуудаар иргэд ихээр нэвтэрч орж, гарч байгаа.

Улирлын чанартай жилд цөөхөн хоногоор нээгддэг боомтуудаар ихэвчлэн тухайн орон нутгийн иргэд хил нэвтэрдэг.