ХУУЧИРСАН МЭДЭЭ: 2015/10/01-НД НИЙТЛЭГДСЭН
Визгүй зорчихоор болсон БРАЗИЛ орны тухай АРВАН ТАВАН БАРИМТ
iKon.MN
Бидний хувьд төдийлөн танил биш Бразил орныг хэр сайн мэдэх вэ? Хөлбөмбөгөөс цааш мэдэх олон зүйл бий.
- Бразил бол хүн амын тоогоор (201 сая), бас газар нутгийн хэмжээгээр (8.5 сая км.кв) дэлхийд тавд ордог улс.
- Өмнөд Америк тивийн 47 хувийг дангаар эзэлж Эквадор, Чилиэс бусад тивийн бүх улсуудтай хиллэдэг.
- Далбаан дээр нь байдаг уриа үг “Ordem e Progresso” нь “Дэг журам, Хөгжил дэвшил” гэсэн утгатай.
- Бразил бол Португалийн Америк тив дэх анхны колони. Тэд 1532 онд анхны сууринг байгуулж байсан нь Сан Висент хот.
- Нийслэл Бразилиа хотыг 1956-1960 онд 41 сарын дотор байгуулсан. Өмнө нь Рио де Жанейро 197 жилийн турш нийслэл байжээ.
- Бразил 150 жилийн турш дэлхийн хамгийн том кофены экспортлогч байсан. 1920-оод оны үед Бразил энэ зах зээлийн 80 хувийг эзэлдэг байв. Харин өнөөдөр буурсаар гуравны нэг орчимд хүрчээ.
- Бразилд оршдог Амазон мөрөн бол усны хэмжээгээр дэлхийд тэргүүлдэг. Секунд тутамд 209,000 куб метр ус урсан Атлантын далайд цутгадаг. Энэ нь түүний дараа ордог долоон том голыг нийлүүлсэнтэй тэнцүү. Мөн дэлхийн хамгийн гүн нуур болох Байгалыг дөрөв хүрэхгүй жилийн дотор дүүргэх чадалтай гэсэн үг.
- Бразилийн хүн амын хамгийн түгээмэл овог бол Силва.
- Бразил 4,000 гаруй онгоцны буудалтай нь АНУ-ын дараа хоёрт орох үзүүлэлт
- Бразилийн Амазоны ширэнгэнд хүн төрөлхтнөөс тусгаарлагдсан доод тал нь 70 овог байгаа гэдэг.
- Бразилийн хүн амын дотор 1.5-2.5 сая Япон гаралтай иргэд байдаг. Дэлхийн хоёрдугаар дайны дараа Бразилд ирсэн цагаачдын удам. Мөн Герман удмынхан ч цөөнгүй бий.
- Бразилд жил бүр зургаан сая жуулчин ирдэг нь хүн амтай нь харьцуулахад дэлхийд хамгийн багад орно. Тэдний хагас нь зөвхөн Рио де Жанейрод очдог.
- Бразил бол дэлхийн хамгийн олон биологийн төрөл зүйлтэй орнуудын нэг бөгөөд нийт дөрвөн сая төрөл зүйлийн ургамал, амьтантай. Дэлхийн хамгийн олон төрлийн сармагчинтай улс.
- Рио де Жанейро хот 2012 онд Дэлхийн Соёлын Өвд бүртгэгдсэн. Жил бүрийн Карнавалд нь хоёр сая орчим хүн оролцдог. 2015 оны Карнавалын үеэр засгийн газар 70 сая бэлгэвч үнэгүй тарааж байжээ.
- Бразилийн Сальвадор хотын хүн амын 82 хувь нь боолуудын удам тул энэ хотыг “Африк тивийн гаднах хамгийн том Африк хот” гэдэг.
Анхааруулга
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
