Өршөөлийн хуульд тавьсан Ерөнхийлөгчийн хоригийг хүлээж авлаа
Өршөөл үзүүлэх тухай хуульд Монгол Улсын Ерөнхийлөгчийн тавьсан хоригийг хүлээж авах эсэхийг УИХ-аар хэлэлцэж хуралдаанд оролцсон гишүүдийн олонхын саналаар хүлээж авлаа.
Ерөнхийлөгч Өршөөл үзүүлэх тухай хуулийн 9 дүгээр зүйлийн 9.1.3-т заасан "өршөөлд хамааруулахгүй нөхцөл байдал-д Хээл хахууль авах (Эрүүгийн хуулийн 268 дугаар зүйл), Төрийн албан тушаалтан албаны эрх мэдэл буюу албан тушаалын байдлаа урвуулах (Эрүүгийн хуулийн 263 дугаар зүйл), Төрийн албан тушаалтан эрх мэдлээ хэтрүүлэх (Эрүүгийн хуулийн 264 дүгээр зүйл), Хууль бусаар хөрөнгөжих (Эрүүгийн хуулийн 270 дүгээр зүйл), Төсвийн хөрөнгийг зориулалтын бусаар зарцуулах (Эрүүгийн хуулийн 273 дугаар зүйл), Бусдын эд хөрөнгийг залилан мэхэлж авах (Эрүүгийн хуулийн 148 дугаар зүйлийн 148.4), Бусдын эд хөрөнгийг завших, үрэгдүүлэх (150 дугаар зүйлийн 150.3) зэрэг зүйл заалтыг заавал тусгах ёстой гэсэн зарчмын байр сууриа илэрхийлж, хориг тавьсан.
Мөн Монгол Улсын Үндсэн хуульд заасан шударга ёсны зарчим, өмнөх Өршөөлийн хуулиудад тусгагдаж ирсэн төрийн бодлого, зарчмыг иш үндэс болгон насанд хүрээгүйчүүд, жирийн иргэд олноор үйлддэг Танхайрах (Эрүүгийн хуулийн 181 дүгээр зүйлийн 181.3) Бусдын эд хөрөнгийг дээрэмдэх (Эрүүгийн хуулийн 147 дугаар зүйлийн 147.2), Бусдын бие махбодид хүнд гэмтэл санаатай учруулах (Эрүүгийн хуулийн 96 дугаар зүйлийн 96.1, 96.2) зэрэг хэрэгт мөн хуулийн 5 дугаар зүйлд заасан жишгийн дагуу эдлээгүй үлдсэн хорих ялаас хоёр жилийг хасах нь зүйтэй гэж үзэн хориг тавиад байсан юм.
Өршөөл үзүүлэх тухай хуулийн 4 дүгээр зүйлийн 4.1 дэх хэсэгт хэсэгчлэн тавьсан Ерөнхийлөгчийн хоригийг хүлээж авах нь зүйтэй гэсэн саналын томьёоллоор санал хураасан бөгөөд хуралдаанд нийт 59 гишүүн оролцож, 48 гишүүн буюу хуралдаанд оролцсон гишүүдийн 81.3 хувь уг саналыг дэмжлээ.
Харин хуулийн 7 дугаар зүйлд хэсэгчлэн тавьсан хоригийг хүлээж авах нь зүйтэй гэсэн саналыг 49 гишүүн буюу хуралдаанд оролцсон гишүүдийн 83.1 хувь дэмжсэнээр хоригийг хүлээн авахаар тогтсон юм. Хоригийг хүлээн авсантай холбогдуулан Улсын Их Хурлын тогтоол гарах бөгөөд уг тогтоолыг гишүүдийн 83.1 хувь дэмжсэнээр Ерөнхийлөгчийн хоригийг хүлээн авч Өршөөл үзүүлэх тухай хуульд нэмэлт, өөрчлөлт оруулахаар боллоо.
Хууль Зүйн Байнгын хорооны санал асуулгын дүн:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
6 СЭТГЭГДЭЛТЭЙ
|
