Э.Бат-Үүл: Ирээдүйн Монгол иргэдийг боловсролтой, зөв хүн болгон хүмүүжүүлэх үйлсэд хамтран зүтгэе

Өнөөдөр 9-р сарын 1. Хүүхэд бүрийн сэтгэл догдлон хүлээдэг “Эрдмийн баяр”-ын өдөр. Энэ өдөр нийслэлийн Засаг дарга бөгөөд Улаанбаатар хотын Захирагч Э.Бат-Үүл нийслэлийн Сонгинохайрхан дүүргийн Тэргүүний 67 дугаар сургуулийн “Эрдмийн баяр”-т оролцлоо.

67 дугаар сургуулийн 1дүгээр анги гэхэд А-О гэсэн бүлэгтэй. 

Тэрээр хуран цугласан хүүхэд багачууд, эцэг эх, багш нарт баярын мэнд хүргээд “Хичээлийн шинэ жилийн нээлтийн баяр бол бие биеэ санасан хүүхдүүдийн сургууль, эрдмийн гараагаа эхэлдэг, багш нарын хүүхдүүдээ догдлон хүлээдэг баярын өдөр. Миний бие та бүхний энэ эрхэм баярт оролцож байгаагаа нэр төрийн хэрэг гэж бодож байна.

Нийслэлийн Засаг даргын хувьд  хамгийн ачаалалтай, шилжилт хөдөлгөөн ихтэй сургуулийг зориуд сонгон ирсэн юм. 67 дугаар сургуулийн 1дүгээр анги гэхэд А-О гэсэн бүлэгтэй. Биеийн тамирын заалаа хүртэл хичээлийн танхим болгосон гээд асуудал бэрхшээл ихтэй сургуулиудын нэг. Тиймээс бид ирээдүй хойч болсон үр хүүхдүүдийнхээ сурах тав тухтай орчныг бүрдүүлэхийн төлөө дээрх асуудлуудыг шийдэж, үе шаттай арга хэмжээ аван ажиллаж байгаагаа дуулгахад таатай байна.

Хамгийн чухал нь хүүхдийг ирээдүйд хэн болох гарааг нь бэлтгэдэг багш нартаа хандаж хэлэхэд “Ирээдүйн Монгол иргэдийг боловсролтой, зөв хүн болгон хүмүүжүүлэх үйлсэд хамтран зүтгэе”. Ингээд энд хуран цугласан хүүхэд багачууддаа сурлагын өндөр амжилт хүсэн ерөөе” гэлээ. Энэ үеэр  Засаг дарга тус сургуулийн 5 сурагчид хичээлийн хэрэгсэл бэлэглэж, тус сургуулийн авьяаслаг хүүхдүүдийн урлагийн тоглолтыг үзэж сонирхсон юм гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.