Циркийн сургуулийн барилгад гарсан галыг бүрэн унтраажээ
Сүхбаатар дүүргийн наймдугаар хороонд байрлах Циркийн сургууль шатсан хэрэг өчигдөр 21.00 цагийн үед гарч, бид мэдээлсэн билээ. Тэгвэл уг галыг 23-24-нд шилжих шөнийн 03.00 цагт бүрэн унтрааж дууссан гэж НОБГ-аас мэдээллээ.
Галыг унтраахад нийслэлийн Онцгой байдлын газрын Гал унтраах, аврах 10 дугаар ангийн 1, 2 дугаар тасаг, Гал унтраах 14, 34 дүгээр анги, нийслэлийн Аврах ангийн 51 албан хаагч ажилласан байна.
Албаны эх сурвалжийн мэдээлж буйгаар Монгол Улсын гавьяат жүжигчин Ж.Раднаабазарын нэрэмжит тус циркийн сургуулийн /хуучин цирк/ дээвэр, дотор талд эд зүйлс шатаж байсан бөгөөд гал түймрийг бүрэн унтраасны дараа тус сургуулийн эрхлэгч, дүүргийн Цагдаагийн 1 дүгээр хэлтсийн жижүүрийн байцаагчид хэргийн газрыг хүлээлгэн өгсөн гэнэ.
Одоо гал түймрийн шалтгаан нөхцлийг тогтоохоор галын шинжээч нар дүүргийн Цагдаагийн 1 дүгээр хэлтсийн мөрдөн байцаагчтай хамтран хэргийн газар үзлэг хийж ажиллаж байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
